الماتى وبلىسىنىڭ پروكۋراتۋراسى 2024 جىلدىڭ 4 قازانى كۇنى ادام قولىنان قازا تاپقان 16 جاستاعى شەرزات بولاتتىڭ ولىمىنە قاتىستى مالىمدەمە جاسادى.
ايتا كەتەيىك، 7 قازاندا بالانىڭ اكەسى الەۋمەتتىك جەلى ارقىلى باس پروكۋرور بەرىك اسىلوۆقا ۇندەۋ جاساپ، جەرگىلىكتى قۇقىق قورعاۋ ورگاندارى تەرگەۋدە زاڭ بۇزىپ وتىر دەگەن ەدى. بۇگىن وبلىستىق پروكۋراتۋرا ءىستىڭ وبەكتيۆتى تۇردە تەرگەلەتىنىنە كەپىلدىك بەردى.

"وزدەرىڭىز بىلەتىندەي، بيىل 4 قازاندا تالعار قالاسىندا توبەلەس ورىن الىپ، قالانىڭ 16 جاستاعى تۇرعىنى پىشاقتالىپ قازا بولدى. تاعى ەكى ازامات اۋىر جاراقات الدى. ءبىز قوعامنىڭ تولقۋىن تۇسىنەمىز جانە بالانىڭ وتباسىنا كوڭىل ايتامىز. پروكۋراتۋرا ورگاندارى كىسى ءولتىرۋ بۇل ءىستى ەرەكشە باقىلاۋىنا العانىن رەسمي تۇردە مالىمدەيمىز"، – دەپ جازىلعان پروكۋراتۋرانىڭ اقپاراتىندا. 

دەرەككوز بويىنشا، وسى قىلمىستى جاسادى دەگەن كۇدىك بويىنشا سوت جەتى ادامدى 2 اي مەرزىمگە قاماعان. 

"ءبىز جاعدايدى تولىق انىقتاپ، كىنالىلەردىڭ ءبارىن جاۋاپقا تارتاتىنداي وبەكتيۆتى تەرگەۋ جۇرەتىنىنە كەپىلدىك بەرەمىز. وسى قىلمىسقا قاتىسى بار ادامداردى جاۋاپكەرشىلىكتەن بوساتاتىنداي ەشقانداي ارەكەت بولمايتىنىنا سەندىرەمىز. تەرگەۋگە كومەكتەسەتىن اقپارات بىلسەڭىز، پروكۋراتۋرا نەمەسە ىشكى ىستەر ورگاندارىنا جۇگىنۋگە شاقىرامىز"، – دەلىنگەن حابارلامادا.