قازاقستاندا موپەدتەرگە ءنومىر تاعۋدى مىندەتتەيتىن زاڭنامالار 2025 جىلعى ساۋىردەن باستاپ كۇشىنە ەنەدى. قولدانىستاعى تالاپتار بويىنشا ءنومىر كولىكتىڭ تەك ارتقى جاعىنا تاعىلادى. الايدا، استانا مەن الماتىدا 14 مىڭعا جۋىق سەرگەك كامەرالارى ورناتىلعان بولسا، ولاردىڭ تەك مىڭعا جۋىعى عانا اۆتوترانسپورتتى ارتقى جاعىنان باقىلاۋعا ارنالعان. وسى ورايدا، Sergek Group كومپانياسىنىڭ وكىلى Kolesa.kz باسىلىمىنا ماسەلەنى شەشۋدىڭ جولدارىن ايتىپ بەردى.

"استانادا مۇنداي 150 كامەرا بولسا، الماتىدا 800-گە جۋىق. ولار قالانىڭ تەك ورتالىق بولىكتەرىندە عانا ەمەس، شەتكى ايماقتارىندا دا ورناتىلعان. ءبىز شىعىس ازيا ەلدەرىنىڭ قالالارىندا، اتاپ ايتقاندا فيليپپيندىك باگيو جانە يندونەزيانىڭ باليكاپانە قالالارىنداعى موپەدتەردى انىقتاۋ تاجىريبەلەرىن زەرتتەدىك. بۇل قالالاردى نەيروجەلى مەن كومپيۋتەرلىك جانار جۇيەسى بەلسەندى قولدانىلادى. ءقازىر ءبىز بالاما قىزمەت تۇرلەرىن قازاقستاندا قولدانۋ جولدارىن ازىرلەۋمەن شۇعىلدانىپ جاتىرمىز"، – دەدى كومپانيانىڭ ونىمدەر جونىندەگى ديرەكتورى نىعمەت ءابدىراحمانوۆ. 

ونىڭ ايتۋىنشا، شىعىس ەۋروپا ەلدەرىنىڭ تاجىريبەسى موپەدتەرگە ءنومىردى تەك ارتقى جاعىنا عانا ەمەس، الدىنا دا تاعۋدىڭ قاجەتتىلىگىن كورسەتكەن. بۇل ترانسپورت قۇرالىن ءدال انىقتاۋعا كومەكتەسەدى. دەگەنمەن، نىعمەت ءابدىراحمانوۆتىڭ ايتۋىنشا، الماتى مەن استاناداعى 14 مىڭعا جۋىق كامەرانى ترانسپورت قۇرالىن ارتىنان دا باقىلايتىن ەتىپ قۇرۋعا بولادى. 
Kolesa.kz دەرەگىنشە، جىل باسىنان بەرى الماتىدا موپەدتەردىڭ قاتىسۋىمەن 743 جول-كولىك وقيعاسى بولىپ، 14 ادام قايتىس بولسا، 757 ادام جاراقات العان.