بارمەنقۇلوۆتىڭ سوزىنشە، باسپا ءسوز كونفەرەنسياسىندا قازاق تىلىندە سۇراق قويعان ءتىلشىنى كەلەكە ەتكەن باس باپكەرگە ايىپپۇل سالىندى.

- قاتەلىكتەر بولادى، ءبىز بۇل تۋرالى جۋرناليستەرمەن دە سويلەستىك. چەرچەسوۆتىڭ ءازىلى، ارينە، شەكتەن شىقتى. مەن ونىمەن جەكە دە سويلەستىم، مەملەكەتتىك ءتىلدىڭ وزەكتىلىگى مەن ماڭىزىن ءتۇسىندىردىم. وعان ايىپپۇل سالىندى، - دەدى ادىلەت بارمەنقۇلوۆ.

فەدەراسيا مالىمەتىنشە، ايىپپۇل سومماسى 200 اەك نەمەسە 738 400 تەڭگە.

ايتا كەتەيىك، الەۋمەتتىك جەلىدە فۋتبولدان قازاقستان ۇلتتىق قۇراماسىنىڭ باس باپكەرى ستانيسلاۆ چەرچەسوۆتىڭ قازاق ءتىلىن كەمسىتكەنى تۋرالى ۆيدەو تارادى. تۋريزم جانە سپورت مينيسترلىگى بۇل جاعدايعا بەيجاي قاراماي، قازاقستان فۋتبول فەدەراسياسىنا رەسمي حات تا جولداعان ەدى.

ال سەنات دەپۋتاتى گەنناديي شيپوۆسكيح قحا مۇشەسى رەتىندە ستانيسلاۆ چەرچەسوۆتىڭ قازاق ءتىلىن فرانسۋز تىلىمەن شاتاستىرعان ارەكەتىنە قاتىستى سپورت ءمينيسترى مەن قازاقستان فۋتبول فەدەراسياسىنا ۇندەۋ جولدادى.