پرەزيدەنت قاسىم-جومارت توقايەۆتىڭ تاپسىرماسىن ورىنداۋ ماقساتىندا اقتوبە اۋىل شارۋاشىلىعى تاجىريبە ستانساسىنىڭ نەگىزىندە "قازاق جىلقى شارۋاشىلىعى جانە جەمشوپ ءوندىرۋ عىلىمي-زەرتتەۋ ينستيتۋتى" ج ش س قۇرىلدى. ايتا كەتەيىك، مەكەمە "ۇلتتىق ءعىلىمي-بىلىم بەرۋ ورتالىعى" قۇرامىندا. بۇل تۋرالى 19 قاراشادا اۋىل شارۋاشىلىعى مينيسترلىگى مالىمدەدى.

-جاڭا قۇرىلعان ينستيتۋتتىڭ جۇمىسى – اسىلتۇقىمدى جىلقىلاردىڭ ساپاسىن جاقسارتۋعا، جىلقى شارۋاشىلىعىن بەلسەندى دامىتۋعا، عىلىمي-زەرتتەۋ جۇمىستارىن جۇرگىزۋگە جانە وتاندىق تۇقىمدى سىرتقى نارىققا شىعارۋعا باعىتتالعان. الداعى بەس جىلدا اسىل تۇقىمدى جىلقى سانىن 6-7 پايىزعا ارتتىرۋ كوزدەلىپ وتىر،- دەپ مالىمدەدى ۆەدومستۆو.

جەرگىلىكتى قوستاناي، اداي جانە سوعىمعا ارنالعان مۇعالجار، جابە، كۇشىم گەنوتيپتەرىن كوبەيتۋ ءۇشىن سەللەكسيالىق جانە اسىلداندىرۋ باعىتىندا جۇمىستار بەلسەندى جۇرگىزىلمەك.

-ول ءۇشىن جىلقىلاردىڭ ءارتۇرلى گەنەتيكالىق توپتارى تۋرالى اقپاراتتى ساقتايتىن دەرەكتەر قورىن جانە ۇرىقتار مەن ەمبريوندار بانكى قۇرىلماق. سونداي-اق، بيەلەردى قولدان ۇرىقتاندىرۋ زەرتحانالىق پۋنكتىن سالىپ، ارنايى جىلقى ءوسىرۋشى ماماندارىن دايىنداۋ جوسپارلانىپ وتىر. ارنايى جىلقى ۆەتەرينارلىق كلينيكاسىن اشۋ ارقىلى ۆەتەريناريالىق قىزمەت كورسەتۋ دەڭگەيىنىڭ ساپاسى جاقسارادى، — دەيدى ماماندار.