تۇركىستان قالاسىنىڭ "دوستىق" ۇيىندە "ءاءدىلەتتى كونستيتۋسيا – قۋاتتى مەملەكەت" تاقىرىبىندا دوڭگەلەك ۇستەل ءوتتى. ءىس-شارانىڭ ماقساتى – كونستيتۋسيالىق رەفورمالاردىڭ ماڭىزدىلىعىن تالقىلاۋ، قوعامداعى قۇقىقتىق مادەنيەتتى ارتتىرۋ جانە ءادىل قوعام قۇرۋ ماسەلەلەرى بويىنشا پىكىر الماسۋ.

كەڭەسكە مەملەكەتتىك ورگانداردىڭ وكىلدەرى، قوعام قايراتكەرلەرى، عالىمدار مەن زيالى قاۋىم وكىلدەرى قاتىستى. دوڭگەلەك ۇستەلدى تۇركىستان وبلىستىق ءماسليحاتىنىڭ ءتوراعاسى، كونستيتۋسيالىق رەفورما جونىندەگى كوميسسيانىڭ مۇشەسى نۇرالى ءابىشوۆ جۇرگىزدى.

تۇركىستان وبلىسىنىڭ اكىمى نۇرالحان كوشەروۆ ءوڭىردىڭ الەۋمەتتىك-ەكونوميكالىق دامۋى مەن مەملەكەتتىك ساياساتتى ىسكە اسىرۋدا زاڭ ۇستەمدىگىنىڭ ماڭىزدىلىعىن اتاپ ءوتتى.

«پرەزيدەنت قاسىم-جومارت كەمەل ۇلى توقايەۆتىڭ جارلىعىنا سايكەس 15 ناۋرىزدا جاڭا كونستيتۋسياعا ارنالعان رەسپۋبليكالىق رەفەرەندۋم وتەتىنى بەلگىلى. بۇل ەگەمەن ەلدىڭ بولاشاعىنا جاسالعان ماڭىزدى قادام. كونستيتۋسيالىق رەفورما ەلدى ساياسي جاڭعىرتۋعا، ازاماتتاردىڭ قۇقىقتارى مەن بوستاندىقتارىن نىعايتۋعا، قوعام مەن مەملەكەت اراسىنداعى ءوزارا سەنىمدى نىعايتۋعا باعىتتالعان. بۇل "حالىق ۇنىنە قۇلاق اساتىن مەملەكەت" تۇجىرىمداماسىنىڭ جارقىن كورىنىسى. جاڭا كونستيتۋسيالىق مودەلدىڭ ارقاسىندا ءبىز ءادىل قازاقستاننىڭ ىرگەتاسىن قالاپ وتىرمىز»، - دەدى كوشەروۆ.

ونىڭ ايتۋىنشا، جاڭا زاڭدا ادامنىڭ قۇندىلىعى ارتىپ،"ادام مەملەكەت ءۇشىن ەمەس، مەملەكەت ادام ءۇشىن" قاعيداسى الدىڭعى قاتارعا شىعادى.

«الەۋمەتتىك جاۋاپكەرشىلىك كۇشەيىپ، مەملەكەتتىڭ حالىق الدىنداعى مىندەتتەرى كەڭەيتىلىپ، تەڭسىزدىكتى ازايتۋ تەتىكتەرى بەكىتىلۋدە. ءبىلىم، عىلىم جانە يننوۆاسيا ەلىمىزدىڭ باستى يدەولوگياسى رەتىندە انىقتالادى. ءتارتىپ پەن ادىلەتتىلىك، ياعني زاڭنىڭ ۇستەمدىگى جانە تابيعاتقا ۇقىپتى قاراۋ العاش رەت كونستيتۋسيالىق دەڭگەيدە بەكىتىلەتىن بولادى. ءادىل كونستيتۋسيا-بىزدىڭ قۋاتتى مەملەكەتىمىزدىڭ بەرىك وزەگى. سوندىقتان بارلىعىن 15 ناۋرىزداعى رەفەرەندۋمعا بەلسەندى قاتىسۋعا شاقىرامىن. بۇل ەلىمىزدىڭ تاعدىرىن ايقىندايتىن، ءاربىر ازاماتقا بولاشاققا تىكەلەي ۇلەس قوسۋعا مۇمكىندىك بەرەتىن تاريحي مۇمكىندىك»، – دەپ اتاپ ءوتتى كوشەروۆ.

كەڭەس بارىسىندا تۇركىستان وبلىسى قازاقستان حالقى اسسامبلەياسى جانىنداعى انالار كەڭەسىنىڭ ءتوراعاسى گۇلسارا توققۇلوۆا ءسوز سويلەپ، قوعامداعى بىرلىك پەن وتباسى قۇندىلىقتارىنىڭ ماڭىزدىلىعىنا نازار اۋداردى. تۇركىستان وبلىسى ادىلەت دەپارتامەنتى باسشىسىنىڭ ورىنباسارى نۇرلان ەرمەكەشوۆ قۇقىقتىق جۇيەنى جەتىلدىرۋدەگى كونستيتۋسيالىق رەفورمالاردىڭ ءرولى تۋرالى ايتىپ بەردى.

اقىن-ايتىسكەر بەكارىس شويبەكوۆ جانە باسقا دا زيالى قاۋىم وكىلدەرى ەلدىڭ دامۋى ءۇشىن ۇلتتىق سانانىڭ رۋحاني قۇندىلىقتارى مەن ماڭىزى تۋرالى ءوز ويلارىمەن ءبولىستى.

دوڭگەلەك ۇستەل سوڭىندا قاتىسۋشىلار قوعامدى جاڭعىرتۋداعى كونستيتۋسيالىق رەفورمالاردىڭ ماڭىزدىلىعىن اتاپ ءوتىپ، قۇقىقتىق مەملەكەت قۇرۋ باستاماسىنا قولداۋ ءبىلدىردى.