پرەزيدەنت قاسىم-جومارت توقايەۆ تۇركىستان وبلىسى جەتىساي اۋدانىنداعى جەكە ۇيدە بولعان ءورتتىڭ سالدارىنان كوپتەگەن ادامنىڭ قازا تابۋىنا بايلانىستى كوڭىل ايتتى، - دەپ حابارلايدى اقوردا. 

ۇكىمەت پەن تۇركىستان وبلىسىنىڭ اكىمىنە زارداپ شەككەن ازاماتتاردىڭ تۋعان-تۋىستارىنا بارلىق قاجەتتى كومەك كورسەتىپ، قايعىلى وقيعانى جان-جاقتى تەكسەرۋدى تاپسىردى.

تۇركىستان وبلىسى تجد مالىمەتىنشە، 18 قاراشادا تاڭەرتەڭ جەتىساي اۋدانىنداعى العاباس اۋىلىندا ەكى قاباتتى جەكە تۇرعىن ۇيدە ءورت شىققانى تۋرالى حابار تۇسكەن.

ءورت ءسوندىرۋ بولىمشەسى جەتكەن كەزدە ءۇي تولىقتاي ورتكە ورانعان.

"بارلاۋ جانە ءورتتى ءسوندىرۋ كەزىندە ۇيدەن ەس-تۇسسىز كۇيدە جاتقان ءۇش ادام ەۆاكۋاسيالانىپ، جەدەل مەديسينالىق جاردەم بريگاداسىنا تاپسىرىلدى. ىشتەن توعىز بالانى قوسا العاندا، 12 ادام ءولى تابىلدى"، – دەلىنگەن حابارلامادا.

كورشىلەردىڭ ايتۋىنشا، ءورت شىققان كەزدە ۇيدە قوناقتار بولعان، سەبەبى الدىڭعى كۇنى ءۇي يەلەرى وتباسىلىق شارا ۇيىمداستىرعان.

360 شارشى مەتر اۋماقتاعى ءورت تولىق ءسوندىرىلدى. وقيعا ورنىندا بارلىق جەدەل قىزمەت جۇمىس ىستەپ جاتىر. تەرگەۋ باستالدى، ءورتتىڭ شىعۋ سەبەبى انىقتالىپ جاتىر.