قازاقستان رەسپۋبليكاسى پارلامەنتى ءماجىلىسىنىڭ زاڭناما جانە سوت-قۇقىقتىق رەفورما كوميتەتىنىڭ مۇشەسى دەپۋتات ابزال قۇسپان تالعاردا بولعان قايعىلى وقيعاعا قاتىستى پىكىر ءبىلدىردى.
«سوڭعى كۇندەرى تالعارداعى شەرزات پولاتتىڭ ولىمىنە قاتىستى قوعامدا قىزۋ تالقىلاۋ ءجۇرىپ جاتقانى بەلگىلى. الەۋمەتتىك جەلىلەردە ءارتۇرلى اقپاراتتاردىڭ تارالۋىنا بايلانىستى، كوپ جاعدايدا تەكسەرىلمەگەن، ەموسياعا تولى جازبالار مەن بەينەۇندەۋلەرگە نازار اۋدارىلۋدا. وسىعان بايلانىستى ارىپتەسىم، دەپۋتات، زاڭ عىلىمدارىنىڭ دوكتورى ءۇنزيلا شاپاقپەن بىرگە ورىن العان وقيعانىڭ مان-جايىمەن جەتە تانىسۋ ءۇشىن ارنايى الماتى وبلىسىنا باردىق. ءىستىڭ بارىسىن زەردەلەۋ ماقساتىندا الماتى وبلىسى پروكۋرورى بەرىك ابىزبايۇلىمەن، وبلىستىڭ پوليسيا دەپارتامەنتىنىڭ باسشىسى مەيرام جۇمكەنۇلىمەن جولىقتىق. مەن، زاڭگەر رەتىندە، بۇل اۋىر جاعدايلاردى قۇقىقتىق تۇرعىدا قاراستىرۋدىڭ ماڭىزدىلىعىن اتاپ وتكىم كەلەدى. مۇنداي ىستەردە قوعام تاراپىنان جاسالعان قىسىم تەرگەۋ امالدارىنىڭ وبەكتيۆتى ءارى جان-جاقتى جۇرگىزىلۋىنە كەرى اسەرىن تيگىزۋى مۇمكىن»، — دەدى حالىق قالاۋلىسى.
پروكۋراتۋرانىڭ رەسمي اقپاراتىنا سايكەس، قاساقانا كىسى ءولتىرۋ كۇدىگىمەن 11 ادام ادام ۇستالعان. قازىرگى تاڭدا ءتيىستى تەرگەۋ امالدارى جۇرگىزىلۋدە.
«وسى ءىس بويىنشا 170 استام كۋاگەرلەردەن جاۋاپ الىنىپ، 40 جۋىق ساراپتاما تاعايىندالىپ، جان-جاقتى تەرگەلىپ جاتىر. سونىمەن قاتار، شەرزات پولاتتىڭ اعاسى ن. عايىپبايەۆتىڭ ءولىمى دە باس پروكۋراتۋرا مەن ىشكى ىستەر مينيسترلىگىنىڭ باقىلاۋىندا ەكەنىن اتاپ وتكەن ءجون. ول بويىنشا سوت-مەديسينالىق ساراپتامالار جۇرگىزىلۋدە. قىلمىستىق ءىستىڭ قوعامدىق ماڭىزدىلىعىنا بايلانىستى، مەن تەرگەۋ بارىسىمەن تانىسىپ، زاڭگەر رەتىندە ءمان-جايدى ناقتى انىقتاۋ ءۇشىن جۇمىس ىستەپ جاتىرمىن. بۇل ءىستىڭ ءادىل ءارى اشىق قارالۋىنا ىقپال ەتۋ – باستى ماقساتىمىز. العاشقى ناتيجەلەرگە كەلسەك، وبلىس پروكۋرورى بەرىك ابىزبايۇلىمەن كەزدەسۋ بارىسىندا تەرگەۋ امالدارىنىڭ بارىنشا زاڭ اياسىندا جانە تياناقتى جۇرگىزىلۋىن تالقىلادىق. وبلىستىق پروكۋراتۋرا بۇل ءىستىڭ قۇقىقتىق جانە ادىلدىك پرينسيپتەرىنە ساي قارالاتىنىن مالىمدەپ، بىزگە ۋادە بەردى»، — دەدى ابزال قۇسپان.
سونداي-اق ول الداعى ۋاقىتتا تەرگەۋ بارىسى مەن رەسمي اقپاراتتار تۋرالى قوعاممەن ۇنەمى ءبولىسىپ وتىراتىنىن ايتتى. بۇدان بولەك كەز كەلگەن راستالماعان اقپاراتتان اۋلاق بولۋعا جانە رەسمي دەرەككوزدەرگە سۇيەنۋگە شاقىردى.
پىكىر قالدىرۋ