مارقۇمنىڭ جاقىندارى كۇدىكتىنىڭ قاتاڭ جازالانۋىن تالاپ ەتىپ وتىر. 

قازاقستاندىق تاي بوكسىنان الەم چەمپيونى ءالي سەرىكتىڭ 11 جىل بىرگە وقىعان سىنىپتاسى ادام ءولتىردى دەگەن كۇدىكپەن ۇستالدى. 

“جۇرەك تۇسىنان ءتورت رەت ۇرعان. مويىننان ۇرعان. قولىندا ەكى پىشاق بولعان عوي. قوس قولداپ ەكى پىشاقپەن ۇرعان عوي. ەكەۋى نەگىزى ءبىر مەكتەپتە، ءبىر سىنىپتا وقىعان. وسى ۇيدە اۋىزاشاردا بولىپ، ورازا كەزىندە اۋىز اشىپ، كومەكتەسىپ جۇرگەن بالا ەدى. اليمەن بىرگە قار كۇرەپ جۇرەتىن”، – دەيدى ءاليدىڭ اناسى اقمارال تابىسبەك قىزى.

ال مارقۇمنىڭ باپكەرى ءاليدىڭ كەلەر جىلى ەرەسەكتەر اراسىندا وتەتىن قازاقستان چەمپيوناتىندا قاتىسۋى كەرەك ەدى دەيدى. 

“ءالي ەڭ جاس الەم چەمپيونى بولعان. ءبىز ودان ۇلكەن ءۇمىت كۇتتىك. ول ءارقاشان وزىنەن كەيىنگى جاستارعا ۇلگى بولاتىن. كەلەر جىلى ەرەسەكتەر اراسىندا قازاقستان چەمپيوناتى ءوتۋى كەرەك ەدى. ءالي سول دودانى جەڭىپ، ازيا چەمپيوناتىندا ب ا ق سىناعىسى كەلگەن. تۇبىندە كاسىپقوي سپورتقا تۇبەگەيلى ءوتۋدى جوسپارلاعان ەدى”، – دەيدى باپكەر راميس عابيتوۆ.

ءالي سەرىكتى پىشاقتادى دەگەن كۇدىكتى بىردەن قۇرىقتالىپ، قاماۋعا الىندى.

“وسى ادام ءولتىرۋ دەرەگىنىڭ سەبەبىن “ارامىزدا تۋىنداعان كيكىلجىڭ، جانجالدىڭ سالدارىنان پىشاق جاراقاتىن سالدىم” دەپ تۇسىنىكتەمە بەردى. قىلمىستىق ءىس جۇرگىزۋ كودەكسىنىڭ 128-بابىنىڭ نورمالارى بويىنشا بۇل ازامات قاماۋعا الىندى. قىلمىستىڭ باسقا دا ءمان-جايى انىقتالىپ جاتىر”، – دەيدى الماتى قالاسى پوليسيا دەپارتامەنتىنىڭ رەسمي وكىلى سالتانات ازىربەك.

جانتۇرشىگەرلىك جاعدايعا كۋا بولعان كۋاگەرلەردىڭ ءبىرى ءاليدىڭ كوز الدىندا جان تاپسىرعانىن ايتتى.

- قانسىراپ جۇگىرىپ وسى جەرگە قۇلادى. ەكى جىگىت قاشتى. ارتىنان ءبىر بالا قۋدى. تابا المادىق دەپ، ەكى جىگىت كەلدى. كادىمگىدەي ءتىرى جاتقان. كوز الدىمدا ءولدى”، – دەيدى سەرىك راقىشيەۆ.