2025 جىلدىڭ 1 قاڭتارىنان باستاپ قازاقستان بريكس-تىڭ رەسمي تۇردە سەرىكتەس ەلدەرىنىڭ ءبىرى بولادى. ءبىزدىڭ ەلىمىزدەن باسقا، بۇل ساناتتا بەلارۋس، بوليۆيا، يندونەزيا، تايلاند، كۋبا، ۋگاندا، مالايزيا جانە وزبەكستان دا بار. بۇل تۋرالى ءبىرىنشى بولىپ رەسەي پرەزيدەنتىنىڭ كومەكشىسى يۋريي ۋشاكوۆ مالىمدەدى. ارتىنشا مۇنى قازاقستاننىڭ سىرتقى ىستەر مينيسترلىگى دە راستادى.
قازان ءسامميتىنىڭ ماڭىزدى ناتيجەلەرىنىڭ ءبىرى بريكس-تىڭ سەرىكتەس ەلدەر كاتەگورياسى ەنگىزىلدى. تىزىمدەگى 13 ەل كەلىسىلدى. بۇل مەملەكەتتەرگە ءتيىستى شاقىرتۋ جىبەرىلدى»، – دەدى يۋريي ۋشاكوۆ.
سەرىكتەستىك مارتەبەسىنە كەلسەك، 2025 جىلدىڭ 1 قاڭتارىنان باستاپ سەرىكتەس اتاناتىن ەلدەردىڭ وكىلدەرى بريكس ساميتتەرىنىڭ وتىرىستارىنا جانە سىرتقى ىستەر مينيسترلىكتەرىنىڭ كەزدەسۋلەرىنە شاقىرىلىپ وتىرادى.
2024 جىلى 16 قازاندا قاسىم-جومارت توقايەۆتىڭ باسپا ءسوز حاتشىسى بەرىك ءۋالي قازاقستاننىڭ ازىرگە بريكس-كە كىرۋدى جوسپارلاماعانىن مالىمدەگەن ەدى.
ازىرگە بريكس-كە 9 ەل مۇشە. اتاپ ايتقاندا، برازيليا، روسسيا، ءۇندىستان، جۇڭگو، وڭتۇستىك افريكا رەسپۋبليكاسى، بىرىككەن اراب امىرلىكتەرى، يران، مىسىر جانە ەفيوپيا كىرەدى. بۇل ۇيىمنىڭ قاتارى سوڭعى رەت 2024 جىلى 1 قاڭتاردا تولىققان ەدى.
مۇنىڭ الدىندا بريكس-تە دوللارعا بالاما بولاتىن ورتاق ۆاليۋتا شىعارۋ تۋرالى ماسەلە كوتەرىلگەن بولاتىن. اقش-تىڭ قايتا سايلانعان پرەزيدەنتى دونالد ترامپ بريكس مۇنداي قادامعا بارسا، بۇل ەلدەرگە قارسى قاتاڭ ەكونوميكالىق شارا قولدانىلاتىنى تۋرالى مالىمدەمە جاسادى. بۇدان كەيىن بريكس-تىڭ مۇشەسى وار كۇن تارتىبىندە مۇنداي ماسەلە تۇرماعانىن ايتىپ اقتالعان ەدى.
پىكىر قالدىرۋ