مەملەكەتتىك تاپسىرىسپەن جۇمىس ىستەيتىن جەكە مەكتەپتەردى قارجىلاندىرۋ كەشىكتىرىلۋدە. قازىرگى تاڭدا كەمىندە 80 ملرد تەڭگەگە جۋىق قاراجات جەتىسپەيدى.

بۇل تۋرالى ءماجىلىس دەپۋتاتى اسحات ايماعامبەتوۆ ءوزىنىڭ الەۋمەتتىك پاراقشاسىندا جاريالادى. 

— بىرنەشە جىل بۇرىن قازاقستاندا جەكەمەنشىك مەكتەپتەردىڭ سانى نەبارى 25-30 عانا بولاتىن. بۇگىنگى كۇنى ولاردىڭ سانى 800-دەن استى. بۇل — ءبىلىم جانە عىلىم مينيسترلىگىنىڭ (وقۋ-اعارتۋ مينيسترلىگى — رەد.) مەملەكەتتىك تاپسىرىس پەن جان باسىنا قارجىلاندىرۋدى ەنگىزگەن ماقساتتى ساياساتىنىڭ ناتيجەسى. وسىلايشا، جەكە مەكتەپتەر جەلىسى تەز دامىپ، مەملەكەت مەكتەپتەردەگى ءۇش اۋىسىمدىلىق ماسەلەسىن، اسىرەسە وڭتۇستىك وڭىرلەر مەن ءىرى قالالاردا، شەشۋگە مۇمكىندىك الدى. جۇزدەگەن مىڭ جاڭا وقۋشى ورنى قۇرىلىپ، جۇزدەگەن مەملەكەتتىك مەكتەپتەر ءۇش اۋىسىمدىلىقتان قۇتىلدى. مۇنى جوققا شىعارۋ مۇمكىن ەمەس، — دەيدى دەپۋتات.

ونىڭ ايتۋىنشا، جەكە مەكتەپتەرگە ءارتۇرلى كوزقاراس بولۋى مۇمكىن. الايدا مەكتەپتەر اراسىندا التەرناتيۆا مەن باسەكەلەستىكتىڭ بولۋى جالپى جۇيە ءۇشىن پايدالى. 

— ءقازىر جەكە مەكتەپتەردىڭ دامۋى الاڭداۋشىلىق تۋدىرىپ وتىر. كوپتەگەن مەكتەپتەر، اسىرەسە اتا-انالاردان قوسىمشا قاراجات الماي، تەك مەملەكەتتىك تاپسىرىس ەسەبىنەن جۇمىس ىستەيتىندەرى بانكروت بولۋدىڭ از-اق الدىندا تۇر. نەلىكتەن؟ ويتكەنى مەملەكەتتىك قارجىلاندىرۋ ۇلكەن كەشىگۋلەرمەن تۇسەدى. بۇل تەك ەسەپ بەرۋ قۇجاتتارىنداعى ساندار ەمەس — بۇل مۇعالىمدەردىڭ جالاقىسى، كوممۋنالدىق قىزمەتتەر، سالىقتار. ونىڭ ۇستىنە، كوپتەگەن مەكتەپتەر 2023 جانە 2024 جىلدارعا ارنالعان قارجىلاندىرۋدى ءالى كۇنگە دەيىن تولىعىمەن المادى. بۇل ماسەلە جەكەمەنشىك مەكتەپتەردىڭ جۇمىسكەرلەرىمەن بولعان كەزدەسۋدە اشىق كوتەرىلدى، ويتكەنى تۇراقتى قارجىلاندىرۋسىز مەكتەپتەردىڭ قالىپتى جۇمىس ىستەۋى مۇمكىن ەمەس. بيىل جاعداي ودان ءارى ناشارلاۋى ىقتيمال، — دەيدى اسحات ايماعامبەتوۆ.

دەپۋتاتتىڭ ايتۋىنشا، جەكە مەكتەپتەردى قارجىلاندىرۋ رەسپۋبليكالىق بيۋدجەتتەن جەرگىلىكتى بيۋدجەتكە بەرىلگەن. الايدا بارلىق اكىمدىكتەر بۇل وزگەرىستەر تۋرالى ءبىلىپ، ءتيىستى قارجىلاندىرۋدى تولىعىمەن بولمەگەن. 

— قازىرگى تاڭدا كەمىندە 80 ملرد تەڭگەگە جۋىق قاراجات جەتىسپەيدى. جاقىن ارادا بۇل ماسەلە شەشىلىپ، مەكتەپتەردىڭ ۇزدىكسىز قارجىلاندىرىلۋى قامتاماسىز ەتىلەدى دەپ ۇمىتتەنەمىن، — دەپ ءتۇيدى ءسوزىن ءماجىلىس دەپۋتاتى.