سەنات دەپۋتاتى جانە بۇرىنعى ىشكى ىستەر ءمينيسترىنىڭ ءبىرىنشى ورىنباسارى مارات قوجايەۆ الماتىداعى كافەلەردىڭ بىرىندە شەتەلدىك ستۋدەنتتەردىڭ جاپپاي توبەلەسىنە قاتىستى پىكىر ءبىلدىردى.

توبەلەستىڭ بەينەجازباسى الەۋمەتتىك جەلىدە تارالدى. جازبادا بىرنەشە جىگىتتىڭ ءبىر-بىرىن ۇرىپ-سوعىپ، ورىندىقتاردى، تاياقتاردى، ءتىپتى ۇستەلدەردى قولدانعانى كورىنەدى.

مارات قوجايەۆتىڭ ايتۋىنشا، ستۋدەنتتەردى ەلدەن شىعارۋ تۋرالى شەشىم زاڭ تالاپتارىنا سايكەس قابىلدانعان.

"ءبىزدىڭ ەلىمىزدە جۇرگەن كەز كەلگەن شەتەلدىك ازامات ءبىزدىڭ زاڭدارىمىزدى، تارتىپتەرىمىزدى، داستۇرلەرىمىزدى، ادەت-عۇرىپتارىمىزدى قۇرمەتتەۋى جانە ەڭ باستىسى، ءوزىن قالاي ۇستاۋ كەرەكتىگىن ءبىلۋى كەرەك. بۇل – بۇكىل الەمگە ورتاق تاجىريبە. باسقا ەلگە بارعاندا، سول ەلدىڭ زاڭدارىن ساقتاۋعا تىرىساسىز"، – دەدى قوجايەۆ سەنات دالىزىندە.

سونداي-اق سەناتور زاڭدى بۇزعان شەتەلدىكتەردىڭ قازاقستانعا 5 جىل بويى ورالا المايتىنىن ايتتى.

"بۇل جاعدايدا قوعامدىق ورىندا بىر-بىرىنە دەنە جاراقاتىن سالۋعا جاقىن زاڭدى ورەسكەل بۇزۋ ارەكەتى بولدى. سوندىقتان زاڭىمىز وسىنداي جاعدايلاردا شەتەلدىكتەردى ەلدەن شىعارۋدى تالاپ ەتەدى. ولاردىڭ قازاقستاندا ءبىلىم الۋعا بايلانىستى قۇجاتتارى جويىلادى"، – دەپ قوستى ول.