32ء-شى قىسقى ۋنيۆەرسيادا ويىندارىندا قازاقستان قۇراماسى ساپىنان سپورتتىڭ 10 تۇرىنەن 103 سپورتشى قاتىستى. قاڭتاردىڭ 13ء-ى مەن 23ء-ى ارالىعىندا وتكەن ءدۇبىرلى دودادا ەل قۇراماسى 14 مەدال يەلەندى. جۇلدە سانى بويىنشا بۇل قازاقستاننىڭ ۋنيۆەرسيادا تاريحىنداعى ەكىنشى ۇزدىك ناتيجەسى. بۇعان دەيىن وتانداستارىمىز 2017 جىلى الماتىدا وتكەن بايراقتى باسەكەدە 36 مەدال جەڭىپ العان ەدى.

تۋريندەگى تۋرنيردە قازاقستان سپورتشىلارى 3 التىن، 4 كۇمىس جانە 7 قولا جۇلدە يەلەندى. ەل قورجىنىنا فريستايلشى اناستاسيا گورودكو قوس التىندى سالسا، بياتلوننان نيكيتا اكيموۆ ءانۇرانىمىزدى تۋرين تورىندە ءبىر رەت شىرقاتتى. 

دۇنيەجۇزىلىك قىسقى ويىندار اشىلۋىندا كوك تۋىمىزدى ۇستاپ شىققان اياۋلىم امرەنوۆا پاراللەل موگۋلدان كۇمىس جۇلدە يەلەنسە، ەرلەر اراسىنان ءدال وسى سايىستا انتون بونداريەۆتە كۇمىسپەن كۇپتەلدى. ۋنيۆەرسيادا باعدارلاماسىنا تۇڭعىش رەت ەنگەن پاراشاڭعى سپورت تۇرىندە دەنيس زينوۆ قوس كۇمىستى ولجالادى.

دەنيستەن ءبىر ساتى تومەن ناتيجە كورسەتكەن پاراشاڭعىشى رومان قۇربانوۆتا قوس مەدال ەنشىلەدى. وتانداسىمىزعا بۇيىرعانى 2 قولا مەدال. ال مانەرلەپ سىرعاناۋدان كۇتپەگەن ناتيجە تىركەگەن سوفيا سامودەلكينا دا قولا جۇلدەگە قول جەتكىزدى. شىنى كەرەك، بۇل قولانىڭ قازاقستان ءۇشىن ورنى التىنمەن پارا پار. سونداي-اق، قولاعا قول سوزعاندار اراسىندا بياتلونشىلار ارينا كريۋكوۆا مەن كيريل باۋەر بار. 

كوماندالىق سايىستا شورت-ترەكتەن قازاقستان قۇراماسى قولا مەدال يەلەندى. قۇرامىندا: الينا اجىعالييەۆا، ۆالەريي كليمەنكو، دىنمۇحامەدالديار ءتاجىباي، ماليكا ەرمەك سىندى سپورتشىلاردان قۇرالعان ءبىزدىڭ كوماندا ارالاس ەستافەتادان جۇلدەگەرلەر قاتارىنا قوسىلدى. جانە شورت-ترەكتىڭ 5000 مەترلىك باعدارلاماسىندا دىنمۇحامەدالديار ءتاجىباي، ۆالەريي كليمەنكو، ايبەك تەمىرحان، سانجار جانىسوۆ، الىشەر ابدۋلكاتيموۆتەن قۇرالعان ەرلەر كومانداسى دا قولا مەدال جەڭىپ الدى.

وسىلايشا، الەمنىڭ 46 ەلى قاتىسقان بايراقتى باسەكەنى قازاقستان قۇراماسى جالپى ەسەپتە 12-ورىنمەن اياقتادى. ەكى اپتاعا سوزىلعان دۇنيەجۇزىلىك قىسقى ۋنيۆەرسيادا ويىندارىندا فرانسيا (18 التىن، 8 كۇمىس، 14 قولا) ءبىرىنشى ورىندى يەلەنسە، وڭتۇستىك كورەيا قۇراماسى (8-6-6) ەكىنشى ورىنعا تۇراقتادى. ۇزدىك ۇشتىكتى فينليانديا (8-3-4) تۇيىندەدى.

جالپى جۇلدەلەر سانى بويىنشا قازاقستان قۇراماسى 14 جۇلدەمەن 7-ورىنعا جايعاستى. 40 مەدالدى يەلەنگەن فرانسيا بۇل جاقتا دا كوش باسىندا. ال 23 جۇلدەنى ۇتقان گەرمانيا ەكىنشى ساتىعا ورنالاسسا، ۇزدىك ۇشتىكتە 20 مەدالمەن وڭتۇستىك كورەيا.