مەملەكەت باسشىسى ەلورداداعى ءبىرقاتار نىساندى ارالادى.

قاسىم-جومارت توقايەۆ قازاقستان رەسپۋبليكاسى پرەزيدەنتى ءارحيۆىنىڭ جاڭا عيماراتىنا باردى. مەملەكەت باسشىسىنىڭ تاپسىرماسىنا ساي ارحيۆ الماتىدان استاناعا كوشىرىلدى. بۇل ەل تاريحىنا قاتىستى قۇجاتتار ساقتالاتىن ورىن عانا ەمەس، ءبىلىم جانە عىلىمي-ادىستەمەلىك كەشەن رەتىندە قىزمەت كورسەتەتىن ورتالىق ازياداعى العاشقى ارحيۆ بولماق.

ارناۋلى عيماراتتا مۇراعات قويماسى، زەرتحانالار، ينتەراكتيۆتى ەكسپوزيسيا جانە وقىرمان زالدارى، جۇمىس بولمەلەرى مەن اكىمشىلىك اۋماق ورنالاسقان. مۇنداعى 24 مۇراعات قويماسى قاعاز جۇزىندەگى قۇجاتتاردى، دىبىستىق-بەينەلىك جازبالاردى ساقتاۋعا، سونداي-اق شاعىن تاسپالارداعى جانە ەلەكتروندىق قۇجاتتاردى ساقتاندىرۋ قورىن ورنالاستىرۋعا ارنالعان.

پرەزيدەنت ارحيۆىندە قازاقستاننىڭ 1918 جىلدان بەرگى ساياسي تاريحىنا قاتىستى قۇجاتتاردىڭ مول قورى جيناقتالعان. اتاپ ايتقاندا، قوردا ەلىمىزدىڭ تاۋەلسىز مەملەكەت رەتىندە قالىپتاسۋى، سىرتقى جانە ىشكى ساياساتى، حالىقارالىق قاتىناستارى، ەكونوميكالىق قايتا قۇرۋ ۇردىستەرى مەن الەۋمەتتىك-مادەني دامۋى بويىنشا ماتەريالدار بار.

سونداي-اق، قاسىم-جومارت توقايەۆ كۇلاش بايسەيىتوۆا اتىنداعى قازاق ۇلتتىق ونەر ۋنيۆەرسيتەتىندە جۇرگىزىلىپ جاتقان قايتا جوندەۋ جۇمىستارىنىڭ بارىسىمەن تانىستى.

مەملەكەت باسشىسىنا جاڭعىرتۋ جۇمىستارىنان كەيىن باس عيماراتتىڭ كولەمى 10 مىڭ شارشى مەترگە ۇلعايىپ، 38 مىڭ شارشى مەترگە جۋىقتاعانى جونىندە باياندالدى.

سونىڭ ناتيجەسىندە جاڭا ارناۋلى اۋديتوريالار اشۋعا مۇمكىندىك تۋدى. اۋقىمدى ءىس-شارالار وتكىزەتىن 1100 ورىندىق ۇلكەن كونسەرت زالى پايدالانۋعا بەرىلەدى. بۇدان بولەك، وقۋ كورپۋسىندا اكادەميالىق مۋزىكاعا ارنالعان كامەرالىق زال، دايىندىق ستۋديالارى، ستۋدەنتتەر مەن وزگە دە سۋرەتشىلەردىڭ تۋىندىلارى قويىلاتىن كورمە گالەرەيالارى بار.