ەلوردادا 2017 جىلدان بەرى جۇزەگە اسىرىلىپ كەلە جاتقان “سەرگەك” جوباسى بيىل 13 ناۋرىزدا اياقتالادى. بۇل تۋرالى استانا قالاسىنىڭ سيفرلاندىرۋ جانە مەملەكەتتىك قىزمەتتەر باسقارماسىنىڭ باسشىسى ديدار سۇلەيمانوۆ ءماسليحات وتىرىسىندا مالىمدەدى.

“سەرگەكتىڭ” ورنىنا استانادا جاساندى ينتەللەكت نەگىزىندەگى قالالىق ينفراقۇرىلىمدى باسقارۋدىڭ جاڭا جۇيەسى ىسكە قوسىلادى. بۇعان دەيىن ءماسليحات وتىرىسىندا جاڭا جوبا تانىستىرىلعانىن جازدىق. 

ديدار سۇلەيمانوۆتىڭ سوزىنشە، جاڭا جوبا G42 حولدينگىنە كىرەتىن حالىقارالىق Presight كومپانياسىمەن (ءباا) بىرلەسىپ جۇزەگە اسىرىلادى.

جاڭا جوبانى ازىرلەۋ كەزىندە قازىرگى جۇيەنىڭ كەمشىلىكتەرى ەسكەرىلدى. اتاپ ايتقاندا، اپپاراتتىق-باعدارلامالىق كەشەننىڭ ۇزدىكسىز جۇمىس ىستەۋى ءۇشىن تۇراقتى ەلەكتر قۋاتىمەن قامتاماسىز ەتۋ جوسپارلانعان. سونىمەن قاتار جۇيەنىڭ نەگىزگى ەلەمەنتتەرى، سونىڭ ىشىندە جالپى بەينەباقىلاۋ كامەرالارى، وپتيكالىق بايلانىس جەلىسىنە قوسىلادى، بۇل بەينەاعىندى تۇراقتى تۇردە بەرۋگە مۇمكىندىك بەرەدى، – دەدى ديدار سۇلەيمانوۆ.

قازىرگى تاڭدا وپەراتورلار بەينەاعىندى بەرۋ ءۇشىن 4-5 ءتۇرلى WMS-جۇيەلەرىن پايدالانادى، بۇل ولاردىڭ جۇمىسىن قيىنداتادى. جاڭا جوبا اياسىندا ءبىرىڭعاي بەينەاعىن بەرۋ جۇيەسى ەنگىزىلىپ، مونيتورينگ تيىمدىلىگى ارتتىرىلادى.

قولدانىستاعى ينفراقۇرىلىم جاڭا جەكە سەرىكتەستىڭ باسقارۋىنا بەرىلەدى، بۇل جۇيەنىڭ تۇراقتى جۇمىسىن قامتاماسىز ەتەدى. جوبا اياسىندا:

• 22 مىڭ جالپى بەينەباقىلاۋ كامەراسى،
• 732 اپپاراتتىق-باعدارلامالىق كەشەن – جول قيىلىستارىندا،
• 470 اپپاراتتىق-باعدارلامالىق كەشەن – سىزىقتىق ۋچاسكەلەردە ورناتىلادى.

جۇيە جقە-نىڭ 15 ءتۇرىن بۇزۋدى جانە 35 ءتۇرلى بەينەاناليتيكانى تىركەيدى. 

سپيكەر اتاعانداي، جوبا 2030 جىلعا دەيىن جوسپارلانعان، ال ونىڭ ينۆەستيسيا كولەمى – 53 ميلليارد تەڭگەنى قۇرايدى. قارجىلاندىرۋ تولىعىمەن جەكە سەرىكتەس ەسەبىنەن قامتاماسىز ەتىلەدى، ال جۇمىستىڭ 60%-ىن قازاقستاندىق كومپانيالار ورىندايدى. ينۆەستورعا تولەمدەر تەك نىسان تولىق پايدالانۋعا بەرىلگەننەن كەيىن عانا جۇرگىزىلەدى.