باس پروكۋراتۋرانىڭ مالىمەتىنشە، لاۋازىمدى تۇلعالار تالان-تاراجعا سالعان قاراجات 2021 جىلى كوكشەتاۋ قالاسىندا ەسكى اەروپورتتان باستاپ قان ورتالىعىنا دەيىن "نابەرەجنايا" جاعاجايىن سالۋعا بولىنگەن. 

كۇدىكتىلەردىڭ بيۋدجەت قاراجاتىن اسا ءىرى كولەمدە جىمقىرۋ، تالان-تاراجعا سالۋى قىلمىستىق كودەكستىڭ 189-بابى 4-بولىگى بويىنشا سارالاندى. بۇل باپ بويىنشا مۇلكىن تاركىلەۋمەن قوسا 12 جىلعا دەيىن باس بوستاندىعىنان ايىرۋ جازاسى كوزدەلگەن.

“بارلىق كۇدىكتىلەر سوت سانكسياسىمەن كۇزەتپەن ۇستاۋعا الىندى. تەرگەۋ بارىسىندا قىلمىستىق جولمەن الىنعان مۇلىك – استانا قالاسىندا 95 ميلليون تەڭگەگە باعالانعان كوممەرسيالىق جىلجىمايتىن مۇلىك تابىلدى”، – دەلىنگەن حابارلامادا.

سونداي-اق "نابەرەجنايا" جوباسى بويىنشا جۇمىستىڭ ءبىر بولىگى اتباسارداعى باسقا نىساننان جىمقىرىلعان اقشاعا جاسالعانى بەلگىلى بولدى. سوندىقتان ءبىر كۇدىكتىنىڭ ارەكەتى قىلمىستىق جولمەن الىنعان اقشانى جانە وزگە مۇلىكتى زاڭداستىرۋ (جىلىستاتۋ)، ياعني قىلمىستىق كودەكسىنىڭ 218-بابى 3-بولىگى بويىنشا قوسىمشا سارالاندى. بۇل ءۇشىن مۇلكىن تاركىلەۋمەن قوسا 10 جىلعا دەيىن باس بوستاندىعىنان ايىرۋ جازاسى قاراستىرىلعان.