قازاقستاننىڭ دەنساۋلىق ساقتاۋ مينيسترلىگى مەكتەپ وقۋشىلارىنىڭ تاماقتانۋىن ۇيىمداستىرۋعا مەملەكەتتىك باقىلاۋدى كۇشەيتەتىنىن مالىمدەدى.
بۇل شەشىم ماڭعىستاۋ وبلىسى مەكتەپتەرىنىڭ اسحانالارىندا بالالاردىڭ جاپپاي ۋلانۋ جاعدايلارىنان كەيىن قابىلداندى.
مينيسترلىكتىڭ مالىمدەۋىنشە، قازىرگى قولدانىستاعى زاڭناما نورمالارى بالالاردىڭ بارلىق جۇرگەن جەرلەرىن مەملەكەتتىك باقىلاۋ تولىق قامتۋعا مۇمكىندىك بەرمەيدى.
"سانيتاريالىق-ەپيدەميولوگيالىق تالاپتاردىڭ بۇزىلۋىنا بايلانىستى ماسەلەلەردى جۇيەلى تۇردە شەشۋ ءۇشىن دەنساۋلىق ساقتاۋ مينيسترلىگى ءبىلىم بەرۋ وبەكتىلەرىنە مەملەكەتتىك باقىلاۋدىڭ جاڭا تاسىلدەرىن ازىرلەدى. بۇل تاسىلدەر بالالاردىڭ بارعان ورىندارىنا ەرەكشە مارتەبە بەرۋ، تەكسەرۋلەر تۋرالى الدىن الا حابارلامانى الىپ تاستاۋ ارقىلى وبەكتيۆتى باعالاۋ جۇرگىزۋ جانە سانيتاريالىق-ەپيدەميولوگيالىق تالاپتارعا سايكەستىگىن قامتاماسىز ەتۋ ماقساتىندا مونيتورينگتىك ساپارلاردى ەنگىزۋدى كوزدەيدى"، – دەپ حابارلادى ۆەدومستۆونىڭ باسپا ءسوز قىزمەتى.
ماڭعىستاۋ وبلىسى مەكتەپ اسحانالارىنداعى بالالاردىڭ جاپپاي ۋلانۋىنان كەيىن 72 ءبىلىم بەرۋ مەكەمەسىنىڭ ءتىزىمى جاسالدى، ول جەرلەردە اسحانالاردىڭ جوسپاردان تىس تەكسەرۋلەرى جۇرگىزىلەتىن بولادى. بۇگىنگى تاڭدا 14 مەكتەپ اسحاناسى تەكسەرۋدەن ءوتتى.
ۋلانۋ وقيعالارىن تەرگەۋ ءۇشىن اعارتۋ جانە دەنساۋلىق ساقتاۋ مينيسترلىكتەرىنىڭ، سونداي-اق باس پروكۋراتۋرانىڭ وكىلدەرىنەن قۇرالعان ۆەدومستۆوارالىق جۇمىس توبى قۇرىلدى.
وتكەن جىلدىڭ قىركۇيەگىندە ماڭعىستاۋ وبلىسى بەسشوقى اۋىلىنداعى №8 مەكتەپتە 460 وقۋشى جاپپاي ۋلانعان بولاتىن، بالالاردىڭ كوپشىلىگى اۋرۋحاناعا ءتۇستى. وقۋشىلاردىڭ اتا-انالارى جۋرناليستەرگە بالالاردىڭ اسحانادان ءجيى ساپاسىز تاماق ىشەتىنىنە شاعىمدانعان.
