پرەمەر-مينيستر ولجاس بەكتەنوۆ قاراعاندى وبلىسىنا جاساعان جۇمىس ساپارى بارىسىندا مونوقالالاردى دامىتۋ ماسەلەلەرى جونىندەگى رەسپۋبليكالىق كەڭەس وتكىزدى. جيىندا مەملەكەت باسشىسىنىڭ تاپسىرماسىنا سايكەس مونوقالالاردى دامىتۋدىڭ جاڭا تاسىلدەرى قارالدى. كەڭەستە ەكىباستۇز قالاسىنىڭ مونوقالا مارتەبەسىنەن ايىرىلۋى مۇمكىن ەكەنى ايتىلدى.
"قازىرگى ۋاقىتتا ەكىباستۇزدىڭ ەكونوميكالىق قۇرىلىمى ءارتاراپتانىپ، ول كوپسالالى قالاعا اينالىپ كەلەدى. وسىعان بايلانىستى، قالا ءۇشىن مونوقالا مارتەبەسى وزەكتى ەمەس بولىپ قالۋدا"، – دەدى ۇكىمەت باسشىسى.
پرەمەر-مينيستر ينفراقۇرىلىمدىق ساياساتتى جاڭارتۋ جانە جەتىلدىرۋ باعىتىنداعى جۇمىستى كۇشەيتۋدى تاپسىردى. ونىڭ ايتۋىنشا، مونوقالالاردى دامىتۋداعى باستى مىندەت – جەكە ينۆەستيسيا تارتۋ.
"ءيا، ءبىز ءار قالادا اۋرۋحانا، مەكتەپ، ستاديون جانە وزگە دە الەۋمەتتىك نىساندار سالا الامىز. ءبىراق ەگەر جۇمىسپەن قامتۋ بولماسا، ادامدار سول جەردە تۇرعىسى كەلمەيدى. سوندىقتان ەڭ ماڭىزدى مىندەت – ينۆەستيسيا تارتۋ. ينۆەستورلارعا ناقتى جاعداي جاساۋ قاجەت: بوس تۇرعان عيماراتتار مەن جەر تەلىمدەرىن ۇسىنىپ، جاڭا كاسىپورىندار اشۋعا مۇمكىندىك بەرۋىمىز كەرەك. مۇنداي ءتاسىل بولماسا، دامۋ دا بولمايدى"، – دەدى ولجاس بەكتەنوۆ.
ول ساران، ەكىباستۇز جانە باسقا دا مونوقالالاردا العاشقى ناتيجەلەر بايقالىپ وتىرعانىن اتاپ ءوتتى. دەگەنمەن بۇل باعىتتاعى جۇمىستى ودان ءارى كۇشەيتۋ قاجەت ەكەنىن ەسكەرتتى.
