قازاقستان ىشكى ىستەر ءمينيسترى ەرجان سادەنوۆ نۇرعانات عايىپبايەۆتىڭ ءولىمى مەن قارجاۋباي نۇرىموۆتىڭ تالعارداعى ءۇيىن ورتەۋ وقيعاسىنا قاتىستى قىلمىستىق ىستەردىڭ تەرگەلىپ جاتقانىن مالىمدەدى. بۇل تۋرالى ول 18 ماۋسىمدا جۋرناليستەردىڭ سۇراعىنا جاۋاپ بەرگەن كەزدە ايتتى. ءمينيستردىڭ ايتۋىنشا، اتالعان ىستەر ارنايى پروكۋروردىڭ وندىرىسىندە. "تەرگەۋ امالدارى ءجۇرىپ جاتىر. ءقازىر قانداي دا ءبىر ناقتى تۇسىنىكتەمە بەرە المايمىن. ءبىراق ءبارىن باقىلاۋدا ۇستاپ وتىرمىز"، – دەدى ول.

نۇرعانات عايىپبايەۆتىڭ ولىمىنە قاتىستى تەرگەۋ دە ءالى اياقتالعان جوق. بۇعان دەيىن پوليسيا مارقۇم وز-وزىنە قول جۇمساعان دەگەن نۇسقانى ۇسىنعان. الايدا ونىڭ تۋىستارى بۇل تۇجىرىممەن ۇزىلدى-كەسىلدى كەلىسپەيتىنىن مالىمدەگەن.

2023 جىلدىڭ كۇزىندە تالعار قالاسىندا 16 جاستاعى شەرزات پولات ءبىر توپ ادامنىڭ قولىنان قازا تاپقان. اراعا كوپ ۋاقىت سالماي، مارقۇمنىڭ وتباسىنا تيەسىلى ءۇي ورتكە ورانىپ، شەرزاتتىڭ جاقىن اعاسى نۇرعانات عايىپبايەۆ كۇماندى جاعدايدا كوز جۇمعان ەدى.

شەرزات پولاتتىڭ ولىمىنە بايلانىستى قىلمىستىق ءىس بويىنشا سوت پروسەسى اياقتالىپ، ايىپتالۋشىلار 1،5 جىلدان 23 جىلعا دەيىن باس بوستاندىعىنان ايىرىلدى. الايدا وتباسىنا قاتىستى ورىن العان وزگە ەكى وقيعا – ءۇيدىڭ ورتەنۋى مەن عايىپبايەۆتىڭ ولىمىنە بايلانىستى تەرگەۋ ناتيجەلەرى ءالى كۇنگە دەيىن جاريالانعان جوق.