اتىراۋ وبلىسى جىلىوي اۋدانىنا قاراستى شوقپارتوعاي اۋىلىندا 2016 جىلى پايدالانۋعا بەرىلگەن 605 ميلليون تەڭگەلىك بالاباقشا سۇرىلەتىن بولدى، - دەپ حابارلايدى  Qamshy.kz اق جايىق باسىلىمىنا سىلتەمە جاساپ.

ەل يگىلىگى ءۇشىن سالىنعان «بالداۋرەن» بالاباقشاسى جاڭا بولا تۇرا، ىرگەتاسى شوگىپ، قابىرعالارى قاقىراپ، بۇگىندە اپاتتى كۇيگە تۇسكەن. ءبىراق وسى جاعدايعا جاۋاپتى بىردە-بىر لاۋازىمدى تۇلعا جاۋاپقا تارتىلماعان. قۇرىلىسقا بولىنگەن قوماقتى قارجىنىڭ تاعدىرىنا اكىمدىك تە، مەردىگەر دە ناقتى تۇسىنىكتەمە بەرمەي وتىر.

160 ورىندىق بۇل بالاباقشا «تەڭىزشيەۆرويل» كومپانياسىنىڭ قارجىلاي قولداۋىمەن، «يگىلىك» باعدارلاماسى اياسىندا سالىنعان بولاتىن. الايدا نىسان پايدالانۋعا بەرىلگەن سوڭ كوپ ۇزاماي-اق قابىرعالاردان جارىقتار بايقالا باستاعان. جوبانى جۇزەگە اسىرعان مەردىگەر – «اتىراۋرەمسترويمونتاج» ج ش س بىرنەشە رەت «جوندەۋ جۇمىستارىن» جۇرگىزگەنىمەن، ناتيجە شىقپادى. 2022 جىلى عيمارات رەسمي تۇردە اپاتتى دەپ تانىلىپ، جابىلدى. سودان بەرى ءۇش جىل بويى قاڭىراپ بوس تۇر.

ەڭ سوراقىسى — بۇل جاعدايعا نە سەبەپ بولعانى ءالى كۇنگە دەيىن بەلگىسىز. قۇرىلىس كەزىندە جىبەرىلگەن ورەسكەل قاتەلىكتەر مە، الدە دۇرىس تاڭدالماعان جەر تەلىمى مە – ەشقانداي ناقتى قورىتىندى جوق. تەرگەۋ دە، ساراپتاما دا – قاعاز جۇزىندە عانا. قوعامنىڭ سۇراعىنا: "605 ميلليون تەڭگە قايدا كەتتى؟" دەگەنگە ەشكىم ناقتى جاۋاپ بەرە الماي وتىر. ال قارجى – تولىق يگەرىلگەن.

«بالاباقشا جابىلعانىنا ءۇش جىل بولدى. ءقازىر 20 بالا قۇلسارىعا تاسىمالدانسا، 82 بالا مەكتەپ جانىنداعى شاعىن توپتارعا ورنالاسقان. كوپ اتا-انا بالاسىن ۇيدە ۇستاپ وتىر. سۇرانىس جوعارى»، – دەيدى اۋداندىق ءبىلىم ءبولىمىنىڭ باسشىسىنىڭ مىندەتىن اتقارۋشى گۇلجانسارا تاڭاتاروۆا.

اۋدان اكىمىنىڭ ورىنباسارى گۇلنافيس ايشۋاقوۆا بالاباقشانىڭ تەحنيكالىق ساراپتامادان وتكەنىن، جانە ناتيجەسىندە ونى بۇزۋ تۋرالى شەشىم قابىلدانعانىن مالىمدەدى.

ءبىر قىزىعى، ءدال سول اۋىلدا تاعى ءبىر بالاباقشا قۇرىلىسى باستالىپ كەتكەن. تاعى دا «تەڭىزشيەۆرويل» قارجىسى، تاعى دا اكىمدىك باقىلاۋى. بۇل جولى 280 ورىندىق. قۇرىلىسى كەلەسى جىلى اياقتالادى دەپ جوسپارلانىپ وتىر. ءبىراق بۇل جوبانىڭ تاعدىرى دا بۇرىنعى "بالداۋرەننىڭ" كۇيىن كەشپەسىنە كىم كەپىل؟

ءبىر كەزدەرى بولاشاقتىڭ بالالارى ءۇشىن دەپ سالىنعان نىسان ەندى سۇرىلۋگە بەت الدى. ال جاۋاپتىلار – تاسادا. حالىقتىڭ سەنىمى مەن سالىق تولەۋشىنىڭ اقشاسى تاعى دا دالاعا كەتتى.