يران يزرايلگە قاتىستى تاعى ءبىر قاتاڭ مالىمدەمە جاساپ، حايفا قالاسىنىڭ بەلگىلى ءبىر ايماعىندا تۇراتىن ازاماتتارعا اۋماقتى شۇعىل تۇردە تاستاپ كەتۋگە كەڭەس بەردى. بۇل — سوڭعى كۇندەردەگى ەكىنشى وسىنداي ەسكەرتۋ، جانە ايماقتاعى شيەلەنىس اياسىندا جاعداي ۋشىعا تۇسكەنىن بىلدىرەدى.
يراننىڭ SNN تەلەارناسى تاراتقان اقپاراتقا سايكەس، حايفاداعى ناقتى كوورديناتتار كورسەتىلگەن اۋماقتاعى تۇرعىندارعا شۇعىل ۇندەۋ جاسالدى. حابارلامادا سول اۋداندا تۇراتىندارعا ءقاۋىپ ءتونىپ تۇرعانى ەسكەرتىلىپ، ومىرلەرىن ساقتاپ قالۋ ءۇشىن دەرەۋ ەۆاكۋاسيالانۋ قاجەتتىگى ايتىلدى.
مالىمدەمەگە كارتا قوسا بەرىلىپ، ىقتيمال قاتەر ايماعى ناقتى كورسەتىلگەن. بۇل – سوڭعى بىرنەشە كۇن ىشىندە يران تاراپىنان جاسالعان وسىنداي العاشقى ەسكەرتۋ ەمەس. بۇعان دەيىن يران قارۋلى كۇشتەرى باس شتابىنىڭ باستىعى ابدۋلراحيم مۋساۆي دە تەل-اۆيۆ پەن حايفا تۇرعىندارىنا قالالاردان كەتۋگە كەڭەس بەرگەن بولاتىن.
«حالىق نەتانياحۋدىڭ سوعىسقۇمار ساياساتىنىڭ قۇربانى بولماۋى كەرەك»، – دەپ مالىمدەدى مۋساۆي. الايدا، يران تاراپىنان جاسالعان بۇل قاتاڭ ەسكەرتۋلەرگە قاراماستان، ازىرگە ولاردىڭ ەشقايسىسى ناقتى اسكەري ىس-قيمىلدارمەن راستالعان جوق.
