قۇقىق قورعاۋشى باقىتجان تورەعوجينا 66 كۇن بويى اشتىق جاساعان مارات جىلانبايەۆتى اۋرۋحاناعا جاتقىزۋدى تالاپ ەتتى. بۇل تۋرالى ول ءوزىنىڭ فەيسبۋك پاراقشاسىنا جازدى. 

"5 تامىزدا جىلانبايەۆقا ادۆوكات دەنيس ماليۋگا كىرگەن. ول جىلانبايەۆتىڭ وتىنىشىمەن جەلىدە ونىڭ قان سىنامالارىنىڭ كورسەتكىشىن جاريالادى. مارات جىلانبايەۆتىڭ دەنساۋلىعىنا بايلانىستى شاعىمدارى بار"، دەلىنگەن جازبادا. 

سونداي-اق باقىتجان تورەعوجينانىڭ ايتۋىنشا، مارات جىلانبايەۆ ب ا ق وكىلدەرى مەن حالىقارالىق ۇيىمدار وكىلدەرىنىڭ تۇرمەگە كەلىپ، كەزدەسۋ ۇيىمداستىرۋ ءۇشىن ءوتىنىش جازعان. بۇل ءوتىنىشتى تۇرمە اكىمشىلىگى قابىلداپ، تىركەگەن. الايدا قىلمىستىق اتقارۋ-جۇيەسى كوميتەتى جانە جىلانبايەۆ وتىرعان ستەپناگرسكىدەگى تۇرمە اكىمشىلىگى بۇعان قاتىستى جاۋاپ بەرمەدى. 

بۇعان دەيىن دە مارات جىلانبايەۆتىڭ دەنساۋلىعىنىڭ گاشارلاعانىنا قاتىستى اقپارات تاراعان بولاتىن. الايدا قىلمىستىق اتقارۋ-جۇيەسى كوميتەتى بۇل اقپاراتتى جوققا شىعاردى. 

61 جاستاعى مارافونشى، تىركەلمەگەن وپپوزيسيالىق «العا، قازاقستان!» پارتياسى باستاماشىل توبىنىڭ جەتەكشىسى مارات جىلانبايەۆ سوت شەشىمىمەن جەتى جىلعا سوتتالعان. وعان «ەكسترەميزمدى قارجىلاندىرۋ» جانە «ەكسترەميستىك ۇيىم جۇمىسىنا ارالاسۋ» باپتارى بويىنشا ايىپ تاعىلعان. جىلانبايەۆتىڭ ءوزى دە، جاقتاستارى دا تاعىلعان ايىپپەن دە، ۇكىممەن دە كەلىسپەيدى. ولار ءىستىڭ ساياسي استارى بار دەپ ەسەپتەيدى. بەلسەندىنىڭ ءوزى ۇكىممەن كەلىسپەي بىرنەشە رەت اشتىق تا جاريالاعان.