قونايەۆ قالاسىندا 2026 جىلعا ارنالعان جوسپار ناقتى ايقىندالدى. بۇل تۋرالى قالا اكىمدىگىنىڭ ەكونوميكا جانە قارجى ءبولىمى حابارلادى.
بيىلعا جوسپارلانعان شارالار قالانىڭ ينفراقۇرىلىمىن جۇيەلى جاڭعىرتۋعا، قالا مەن اۋىلدىق وكرۋگتىڭ تەڭگەرىمدى دامۋىن قامتاماسىز ەتۋگە باعىتتالعان.
كەشەندى دامۋ جوسپارى: قالا ينفراقۇرىلىمىن جاڭعىرتۋدىڭ وزەگى
نەگىزگى باسىمدىقتاردىڭ ءبىرى – كەشەندى دامۋ جوسپارىن ىسكە اسىرۋ. 2026 جىلى بۇل باعىتتا قونايەۆتا ءبىرقاتار ماڭىزدى جوبالار جۇزەگە اسىرىلماق. ەلەكتر ەنەرگياسىمەن قامتۋ ماقساتىندا «ارنا» قوسالقى ستانسياسىنىڭ قۇرىلىسى جالعاسىن تابادى. بۇل نىسان بولاشاقتا قالانىڭ جاڭا تۇرعىن ءۇي ماسسيۆتەرى مەن الەۋمەتتىك نىساندارىن تۇراقتى جارىقپەن قامتاماسىز ەتۋگە مۇمكىندىك بەرەدى.
سونىمەن قاتار كولىك قوزعالىسىن جاقسارتۋ جانە جول جۇكتەمەسىن ازايتۋ ءۇشىن م.اۋەزوۆ كوشەسىن جاڭعىرتۋ كوزدەلىپ وتىر. جوبا اياسىندا جول ەكى جولاقتىدان ءتورت جولاقتىعا دەيىن كەڭەيتىلەدى.
اۋىلدىق ەلدىمەكەندەردىڭ ينجەنەرلىك ينفراقۇرىلىمىنا دا ايرىقشا نازار اۋدارىلۋدا. كەربۇلاق جانە سارىبۇلاق اۋىلدارىندا اۋىز سۋ جۇيەلەرى جاڭعىرتىلىپ، تۇرعىنداردى ساپالى اۋىز سۋمەن قامتۋ دەڭگەيى ارتادى. ال شەڭگەلدى اۋىلىندا كوشەلەر جارىقتاندىرىلىپ، جولدار ورتاشا جوندەۋدەن وتەدى. بۇل شارالار اۋىل تۇرعىندارىنىڭ قاۋىپسىزدىگى مەن تۇرمىس ساپاسىن جاقسارتۋعا باعىتتالعان.
بۇدان بولەك، تۇرعىن ۇي-كوممۋنالدىق شارۋاشىلىق سالاسى بويىنشا 30-دان استام جوبا، سونداي-اق جول-كولىك ينفراقۇرىلىمىن جاقسارتۋعا ارنالعان 5 جوبا مەملەكەتتىك ساراپتامادان وتكىزۋگە ۇسىنىلادى. بۇل – الداعى جىلدارى قالانىڭ دامۋ الەۋەتىن ارتتىراتىن ماڭىزدى قادام.
قۇرىلىس سالاسى: قاۋىپسىزدىك پەن قولايلى قالا قۇرۋ
قوعامدىق ءتارتىپ پەن قاۋىپسىزدىكتى نىعايتۋ ماقساتىندا 10-شاعىناۋداندا ۋچاسكەلىك پوليسيا پۋنكتىنىڭ اكىمشىلىك عيماراتى سالىنادى.
سونداي-اق تۋريستىك جانە قوعامدىق الەۋەتى جوعارى «كوشپەندىلەر قالاشىعىن» قايتا جاڭعىرتۋ ءۇشىن جوبالىق-سمەتالىق قۇجاتتاما ازىرلەنەدى. جوبا تۋريستىك الەۋەتتى ارتتىرادى دەپ كۇتىلۋدە.
«ۆوستوچنىي» شاعىناۋدانىنداعى ءۇش كوشەگە ينجەنەرلىك-كوممۋنيكاسيالىق ينفراقۇرىلىم جۇرگىزۋ ءۇشىن دە جسق دايىندالادى.
ينجەنەرلىك جەلىلەر مەن اباتتاندىرۋ
قالا اۋماعىندا ينجەنەرلىك كوممۋنيكاسيالاردى جاڭارتۋ جانە قوعامدىق كەڭىستىكتەردى اباتتاندىرۋ جۇمىستارى جۇيەلى تۇردە جالعاسادى. اتاپ ايتقاندا، №6 جانە №7 جاعاجايلاردى اباتتاندىرۋ جۇمىستارى جۇرگىزىلىپ، تۇرعىندار مەن قالا قوناقتارىنا قولايلى دەمالىس ايماعى قالىپتاستىرىلادى.
سۋمەن قامتۋ بويىنشا التى سۋ ۇڭعىماسىن سالۋعا ارنالعان جوبالىق-سمەتالىق قۇجاتتار ازىرلەنەدى. سونىمەن قاتار قونايەۆ قالاسىندا جاسىل جەلەكتەردى اۆتوماتتاندىرىلعان سۋارۋ جۇيەسىن ەنگىزۋ ءۇشىن دە قۇجات دايىندالادى. اتالعان شارا كوگالداندىرۋ جۇمىستارىن ءتيىمدى جۇرگىزۋگە مۇمكىندىك بەرەدى.
جارىقتاندىرىلماعان كوشەلەرگە جارىق باعانالارى مەن شامدار ورناتىلىپ، تۇرعىن ۇيلەردىڭ شاتىرلارى مەن قاسبەتتەرى جوندەلەدى. قالا اۋماعىندا جاسىل جەلەكتەردى بيولوگيالىق وڭدەۋ، ماسا مەن كەمىرگىشتەرگە قارسى سانيتارلىق جۇمىستار جۇرگىزىلەدى.
«حالىق قاتىساتىن بيۋدجەت» جوباسى اياسىندا تۇرعىنداردىڭ ۇسىنىستارى نەگىزىندە ورتاق پايدالانىلاتىن اۋماقتاردى اباتتاندىرۋ جالعاسادى. سونىمەن قاتار قوعامدىق ورىنداردى تازالاۋ، ساياباقتاردى كۇتىپ ۇستاۋ جانە كوگالداندىرۋ جۇمىستارى دا اتقارىلادى. بۇعان قوسا، قالاداعى بەس شاعىناۋداندى گازداندىرۋ جۇمىستارى اياقتالماق.
جول-كولىك ينفراقۇرىلىمىن دامىتۋ
قونايەۆ قالاسى مەن شەڭگەلدى اۋىلدىق وكرۋگىنىڭ ەلدىمەكەندەرىندە جاڭا اۆتوبۋس ايالدامالارى ورناتىلادى. قالا جولدارىندا اعىمداعى جانە شۇڭقىرلاردى جاماۋ جۇمىستارى جۇرگىزىلىپ، قوزعالىس قاۋىپسىزدىگى ارتادى.
ىلە وزەنى ارقىلى «تاڭبالى تاس» پەن «كوشپەندىلەر قالاشىعىن» بايلانىستىراتىن جاياۋ جۇرگىنشىلەر كوپىرىن سالۋعا جوبالىق-سمەتالىق قۇجاتتاما ازىرلەۋگە قارجى ءبولىندى.
جولاۋشىلار تاسىمالداۋ شىعىندارىن سۋبسيديالاۋعا 372،6 ملن تەڭگە باعىتتالدى. ال الەۋمەتتىك وسال ساناتتاعى ازاماتتاردىڭ قوعامدىق كولىكتە جەڭىلدىكپەن جانە تەگىن ءجۇرۋىن قامتاماسىز ەتۋ ءۇشىن 72،3 ملن تەڭگە قاراستىرىلعان.
اۋىلدىق وكرۋگتەر مەن الەۋمەتتىك قولداۋ
اۋىلدىق اۋماقتاردى دامىتۋ دا باستى نازاردا. شەڭگەلدى اۋىلدىق مادەنيەت ۇيىنە كۇردەلى جوندەۋ جۇرگىزۋ ءۇشىن جوبالىق-سمەتالىق قۇجاتتاما ازىرلەنىپ جاتىر. كەربۇلاق، شەڭگەلدى جانە قوسقۇدىق اۋىلدارىندا بالالار ويىن الاڭدارى سالىنىپ، ەلدىمەكەندەرگە 66 بەينەباقىلاۋ كامەراسى ورناتىلادى.
سونىمەن قاتار «ديپلوممەن اۋىلعا» جوباسى اياسىندا دەنساۋلىق ساقتاۋ، ءبىلىم بەرۋ، مادەنيەت، سپورت، الەۋمەتتىك قامسىزداندىرۋ جانە اگروونەركاسىپ سالاسىنىڭ ماماندارىنا قولداۋ كورسەتىلەدى. بۇل ماقساتقا 9،5 ملن تەڭگە ءبولىنىپ، جاس ماماندارعا 100 اەك كولەمىندە كوتەرمە جاردەماقى تولەنەدى. تۇرعىن ءۇي ساتىپ الۋ نەمەسە سالۋ ءۇشىن 2026 جىلى 69،2 ملن تەڭگە كولەمىندە بيۋدجەتتىك كرەديت قاراستىرىلعان.
حالىقتى الەۋمەتتىك قامسىزداندىرۋ سالاسىنداعى جۇمىستار دا الداعى جىلى جۇيەلى تۇردە جالعاسىن تابادى.
وسىلايشا، قونايەۆ قالاسىندا 2026 جىلعا ارنالعان جوسپارلار تەك جەكەلەگەن سالالاردى قامتىپ قانا قويماي، قالانىڭ ۇزاقمەرزىمدى دامۋىنا نەگىز بولاتىن كەشەندى باعىتتاردى كوزدەيدى.
2026 جىلعا ايقىندالعان مىندەتتەر مەملەكەتتىك ساياساتتىڭ باسىم باعىتتارىمەن ۇندەسىپ، حالىقتىڭ كۇندەلىكتى ومىرىندە سەزىلەتىن ناقتى ناتيجەلەرگە باعىتتالعان. قالانىڭ دامۋ جوسپارى كەزەڭ-كەزەڭىمەن جۇزەگە اسىرىلادى.