قازاقستان رەسپۋبليكاسى ۇلتتىق ۇلانىنىڭ «بۇركىت» ارنايى ماقساتتاعى جاساعىنىڭ جاۋىنگەرلەرى ارنايى جاساقتىڭ ايىرىم بەلگىسى «كۇرەڭ بەرەت» پەن «بۇركىت» كەۋدە بەلگىسىن تاعۋ قۇقىعىن يەلەنۋ ءۇشىن سىناق تاپسىردى. بۇل تۋرالى «قامشى» پورتالى ۇلتتىق ۇلاننىڭ باسپا ءسوز قىزمەتىنە سىلتەمە جاساپ حابارلايدى.

بيىل ون بەسىنشى رەت وتكەن سىناققا قاتىسۋعا بارلىعى 92 اسكەري قىزمەتشى نيەت بىلدىرسە، الدىن الا تەكسەرىستەردەن سوڭ ولاردىڭ سانى ەداۋىر قىسقارىپ، 70 شاقىرىمدىق سىناق باعىتىنا بارلىعى 67 ۇمىتكەر شىققان. ءبىر جارىم تاۋلىك ىشىندە ۇمىتكەرلەر 16 ءتۇرلى نورماتيۆ تاپسىرىپ، كۇشتەرىن سىنادى. وونىڭ اراسىندا دەنە دايىندىعى، اتۋ، ينجەنەرلىك-توپوگرافيالىق دايىندىق، توبەسىنەن وق بوراپ، ىرگەسىندە گراناتا جارىلعان كەدەرگىلەر جولاعىنان ءوتۋ  سىندى بىرنەشە باعىتتاعى نورماتيۆتەردەن قۇرالدى. بابى مەن باعى قاتار شاۋىپ، اۋىر سىننان سۇرىنبەي وتكەندەر اقتىق سىناق - قويان-قولتىق توبەلەستە كەزدەستى.

سىناق سوڭىندا 13 جاۋىنگەر بارلىق سىننان سۇرىنبەي ءوتىپ، وزدەرىنىڭ شىن مىقتى ەكەندىكتەرىن دالەلدەدى. ولارعا ۇلتتىق ۇلان باس قولباسشىسىنىڭ بۇيرىعىمەن ارنايى جاساقتىڭ ايىرىم بەلگىسى كۇرەڭ بەرەت پەن ارنايى كەۋدە بەلگىسى تابىستالدى. سونىمەن قاتار، ارنايى وپەراسيالار كەزىندە ەرلىك پەن باتىلدىق ۇلگىسىن كورسەتكەنى ءۇشىن ۇلتتىق ۇلان كۇرەڭ بەرەت يەلەرى ورتالىق كەڭەسىنىڭ قولداۋىمەن ءىىم «سۇڭقار» ارنايى جاساعىنىڭ قىزمەتكەرلەرى پوليسيا مايورى پەرنەحان جۇسىپالييەۆ پەن پوليسيا كاپيتانى اندرەي ۆولكوۆقا دا اتالعان ايىرىم بەلگىلەرى تاپسىرىلدى.