20 جاستاعى كوكشەتاۋ قالاسىنىڭ تۇرعىنى ءوزىن ورتەپ جىبەرگەن. وقيعا كۋاگەرلەرىنىڭ ايتۋىنشا، مۇنداي ارەكەتكە بوزبالا ازاماتتىق نەكەدەگى يەلىمەن بولعان جانجالدان سوڭ بارعان. بۇل تۋرالى «قامشى» پورتالى اقمولا وبلىستىق ءىىد-ى باسپا ءسوز قىزمەتىنە سىلتەمە جاساپ حابارلايدى.

دەنەسىن ءى دارەجەدەگى كۇيىك شالعان ازامات وبلىستىق اۋرۋحاناعا جەتكىزىلگەن. دارىگەرلەرگە بولعان وقيعانىڭ سەبەبى تۋرالى تۇسىنىك بەرۋدەن باس تارتقان.

الايدا، وقيعانىڭ قالاي بولعانىن جىگىتتىڭ وتباسى مۇشەلەرى ايتىپ بەرگەن. ورتەنگەن جىگىتتىڭ ازاماتتىق نەكەدەگى ايەلى بولعان. تۋىستارىنىڭ ايتۋىنشا ولاردىڭ اراسىندا ءجيى جانجالدار بولىپ تۇرعان. 1 قاراشا كۇنى ول ءوزىنىڭ ازاماتتىق نەكەدەگى ايەلىنىڭ جۇمىسىنا كەلىپ، سول جەردە تاعى دا ۇرىس-كەرىس بولعان. جانجال بارىسىندا ول ايەلىنە ءوزىن ورتەيتىنىن ايتىپ كەتىپ قالعان.

شوشىنعان ايەلى دەرەۋ جىگىتتىڭ اتا-اناسىنا حابارلاسىپ، بارلىعى ۇيگە كەلگەندە، ۇستىنە بەنزين قۇيىپ الىپ وتىرعان جىگىتتى كورەدى. ول جانىنا ەشكىمدى جاقىنداتپاي كوشەگە جۇگىرىپ شىعىپ، ۇستىنە وت قويىپ جىبەرگەن. تۋىستارى ورتەنگەن جىگىتتى ۇستاپ الىپ، وتتى ءوشىرىپ جەدەل جاردەم كولىگىن شاقىرعان.

پوليسيا قىزمەتكەرلەرى ءوز-وزىن ورتەۋگە ارەكەتتەنگەن جىگىتتىڭ بۇرىن مۇنداي قىلىق تانىتپاعانىن، ەشقانداي تىركەۋدە تۇرماعانىن، وتباسى مۇشەلەرىنىڭ بارلىعى تۇراقتى جۇمىس ىستەيتىنىن ايتقان.