مەملەكەت باسشىسى نۇرسۇلتان نازاربايەۆ پارلامەنت سەناتىنان ۇلتتىق بانك ءتوراعالىعىنا دانيار اقىشيەۆتى تاعايىنداۋعا كەلىسىم بەرۋدى سۇرادى. بۇل تۋرالى «قامشى» پورتالى حابارلايدى.
جوعارى پالاتانىڭ پلەنارلىق وتىرىسىنا قر-ى پرەزيدەنت اكىمشىلىگىنىڭ جەتەكشىسى نۇرلان نىعماتۋللين قاتىسقان. ەلباسى سەناتقا ۇندەۋىندە «بۇگىندە بانككە جانە ۇلتتىق ۆاليۋتاعا سەنىم كەمىپ وتىر. مۇنداي تومەنگى كورسەتكىشتەردى جويۋ باعىتىندا جۇمىس ىستەۋ كەرەك. اقىشيەۆتىڭ ءبىلىمى مەن تاجىريبەسى وعان وسى تاپسىرمالاردى ورىنداۋعا مۇمكىندىك بەرەدى دەپ سەنەمىن» دەگەن.
سەنات دەپۋتاتتارى دانيار اقىشيەۆتىڭ كانديداتۋراسىنا كەلىسىمدەرىن بەردى.
دانيار اقىشيەۆ 1976 جىلى الماتى قالاسىندا تۋعان. قازاق مەملەكەتتىك باسقارۋ اكادەمياسىنىڭ تۇلەگى. ءار جىلدارى ورتالىق ازيا قور بيرجاسىندا ەكونوميست بولىپ جۇمىس ىستەگەن. 2007-2014 جىلدار ارالىعىندا قر-ى ۇلتتىق بانكى ءتوراعاسىنىڭ ورىنباسارى مىندەتىن اتقارعان. كەيىن پرەزيدەنت اكىمشىلىگىندە الەۋمەتتىك-ەكونوميكالىق مونيتورينگ ءبولىمىنىڭ مەڭگەرۋشىسى، پرەزيدەنت كومەكشىسى لاۋازىمدارىن اتقارعان.
پىكىر قالدىرۋ