بۇگىن مەملەكەت باسشىسى نۇرسۇلتان نازاربايەۆ اقوردادا اقش-تىڭ مەملەكەتتىك حاتشىسى دجون كەرريدى قابىلدادى. بۇل تۋرالى «قامشى» پورتالى اقورداعا سىلتەمە جاساپ حابارلايدى.

ايتا كەتەيىك، بۇل دجون كەرريدىڭ قازاقستانعا العاشقى ساپارى. "تاياۋدا مەن نيۋ-يوركتە اقش پرەزيدەنتى باراك وبامامەن كەزدەستىم، ەكىجاقتى ىقپالداستىق ماسەلەلەرى جونىندە سويلەستىك. ءبىزدىڭ رەسپۋبليكامىز جەلتوقساندا 24 جىلدىعى تويلاناتىن تاۋەلسىزدىگىنىڭ العاشقى كۇندەرىنەن بەرى ءسىزدىڭ ەلمەن ىنتىماقتاسىپ كەلەدى، ەگەمەندىگىمىز بەن ەكونوميكامىزدىڭ دامۋىنا ۇدايى كورسەتىلىپ كەلە جاتقان قولداۋ ءۇشىن قازاقستان حالقى ريزا. بۇگىندە ەلىمىزدە امەريكالىق كاپيتالدىڭ قاتىسۋىمەن 500-گە جۋىق كومپانيا جۇمىس ىستەيدى. ءبىز وسى جۇمىستى جالعاستىرۋعا نيەتتىمىز"، - دەدى مەملەكەت باسشىسى.

نۇرسۇلتان نازاربايەۆ قازاقستان مەن اقش يادرولىق قارۋسىزدانۋ جانە تاراتپاۋ ماسەلەسى بويىنشا دا ىنتىماقتاسىپ وتىرعانىن ايتتى. وسىعان بايلانىستى باراك وبامانىڭ بۇل باعىتتاعى باستامالارىنا مەملەكەت باسشىسى قولداۋ ءبىلدىردى. نۇرسۇلتان نازاربايەۆ پەن باراك وبامانىڭ نيۋ-يوركتە وتكەن يادرولىق قارۋدى تاراتپاۋ، قارۋلى ەكسترەميزمگە قارسى ءىس-قيمىل، اۋعانستانداعى جاعداي جانە دايش توپتارىنا قارسى كۇرەس ماسەلەلەرى تالقىلانعان كەلىسسوزدەرىنىڭ  قورىتىندىسىن اقش مەملەكەتتىك حاتشىسى جوعارى باعالايتىنىن اتاپ ءوتتى.  سونىمەن قاتار، دجون كەرري قازاقستان مەن اقش-تىڭ تىعىز سەرىكتەستىگى بەس ينستيتۋسيونالدىق رەفورما مەن "100 ناقتى قادام" ۇلت جوسپارىن جۇزەگە اسىرۋ ىسىنە ەلەۋلى ىقپال ەتەتىنىنە سەنىم ءبىلدىردى.

"اقش راسىندا دا قازاقستانداعى ءىرى ينۆەستورلاردىڭ ءبىرى بولىپ سانالادى. بۇگىن مەن امەريكا ساۋدا پالاتاسىنىڭ قازاقستانداعى وكىلدەرىمەن كەزدەستىم. ولار وزدەرىنىڭ ءسىزدىڭ ەلدە قول جەتكىزگەن تابىسىنا قاناعاتتاناتىندارىن ءبىلدىردى"، - دەدى اقش مەملەكەتتىك حاتشىسى.