3 aqpan kúni joǵalyp, keshe múrdesi tabylǵan Astanadaǵy medısınalyq ýnversıtettiń stýdenti Erasyl Áýbákirovti belgisiz adamdardyń azaptap jatqan sáti túsirilgen vıdeosyn KTK telearnasy jarıalady, - dep habarlaıdy «Qamshy» portaly.

Polıseıler men eriktiler bir apta boıy izdegen Erasyldyń múrdesi keshe tańerteń Astananyń syrtynan tabyldy. Aıaq-qoly baılanǵan, aýzyna skoch japsyrylǵan múrdeni belgisiz bireýler basyna paket kıgizip, qarǵa kómip ketken. Osy iske qatysy bar dep qamaýǵa alynǵan 3 jigittiń bireýiniń anasy Sáýle Satybaldına óziniń uly bul iske kezdeısoq kýáger bolǵan dep otyr. Onyń aıtýynsha uly Nurjannyń qujatymen bir tanysy kotej jalǵa alǵan. Nurjan sol qujatty alýǵa barǵanda belgisiz jigitti azaptap jatqandardyń ústinen túsedi. Oqıǵany vıdeoǵa túsirip alady.

Vıdeony túsirgen jigittiń anasy Sáýle Satybaldına: «Bir adamdy baılap qoıǵan eken. Sosyn ulym sýretke túsirip alǵan da qashqan meniń balam. Qashqan dalaǵa. Sosyn muny ustaı almaı qashyp ketedi. Biraq izin jasyrǵan Nurjan tek 2 kúnnen keıin ǵana polıseılerge habar bergen. Polısıa esh oılanbastan onyń ózin qamap tastady», - deıdi.  

Aqtaýdan arnaıy kelgen Sáýle Satybaldına ulynyń taǵdyryna alańdaýly. Aıtýlarynsha, Nurjan esimdi jigit osy jantúrshigerlik oqıǵanyń kýágeri. Kezinde tipti uldary kúdiktilermen birge prokýratýrada jumys istegen kórinedi. Oılamaǵan jerden jantúrshigerlik oqıǵanyń kýási bolǵan. Endi kóz jasy kól bolǵan ana balasynyń kýágerden qylmyskerge aınalyp keterinen qorqady. Onyń ústine basty kúdiktiniń biriniń ata-anasy Óskemendegi aýqatty otbasylar eken.

Marqumnyń týystary men dostary, ustazdary onyń jat qylyqtardan ada úlgili stýdent bolǵanyn aıtýda.