Bólshevıkter qoldan jasalǵan zulmat – asharshylyqtan qyrylǵan qazaqty túgendeıtin saıt ashyldy, - dep habarlaıdy «Qamshy» portaly KTK telearnasyna silteme jasap.

Jobaǵa Qazaqstan Prezıdentiniń muraǵaty muryndyq bolyp otyrǵan kórinedi.

«1930-shy jyldary ashtyqtan qyrylǵan qazaqtardyń aty-jónin endi «asharshylyg.kz» dep atalatyn saıttan tabýǵa bolady.

Jańadan iske qosylǵan elektrondyq jelige kez-kelgen azamat óziniń zulmatty jyldary qaza tapqan ata-babasynyń esimin engize alady. Osylaısha tarıhshylar qoldan jasalǵan qasirettiń qurbandaryn naqty derekter boıynsha eseptemek. Prezıdent muraǵaty muryndyq bolǵan bastamaǵa basqa da aýdandyq, oblystyq deńgeıdegi muraǵat qyzmetkerleri men zertteýshi ǵalymdar atsalysady dep kútilýde. Sebebi, Keńes úkimetiniń solaqaı saıasatynan 1930-shy jyldary ashtyqtan qazaq mıllıondap qyrylyp, tiri qalǵandarynyń ózderi jer aýyp ketken», - dep habarlaıdy telearna.

Borıs Japarov, QR Prezıdenti muraǵatynyń dırektory: 

-Sol qyrylǵan kisiler kómýsiz qalǵan. Otandastarymyzdyń aty-jóni kim edi, qaı jerde, qandaı jaǵdaıda óldi degen suraqtar týyndaıdy. Biz kóbinese statısıkany aıtamyz da sonyń artynda turǵan otandastarymyzdyń kim ekenin bile bermeımiz. Sondyqtan bizdiń bastap otqan jobamyz respýblıkalyq derekter bazasy.