Osy aptada aqparat quraldarynyń synyna arqaý bolǵan taqyryp -  Parlamenttiń sharýashylyq basqarmasy elektrondy satyp alýlar portaly arqyly 11 myń quty araq-sharap satyp almaq bolǵan áreketi. Aqparat quraldarynyń jazǵanyn áleýmettik jeli qoldanýshylary da ilip áketip, depýtattardy jerden alyp jerge saldy. Osy máselege oraı, parlament jaqtan búgin aqtalýǵa uqsaıtyn resmı jaýap shyqty.

«Parlament sharýashylyq basqarmasynyń ákimshilik ǵımarattar dıreksıasy» respýblıkalyq memlekettik kásiporny dep atalatyn mekeme BAQ-tardyń elektrondy poshtalaryna oryn alǵan jaǵdaıǵa qatysty túsinik bergen baspasóz habarlamasyn joldady. Onda kásiporyn basshylyǵy tender jarıalanǵan portalǵa salynǵan málimetterde qate ketken dep otyr. Shyn máninde satyp alynbaq araq-sharap sany 11 myń quty emes, bar bolǵany 519 shólmek qana eken.

«519 dana alkogóldi ónim satyp alý úshin naryqqa taldaý jasaldy. 11000 degen san qate. QR Parlamenti Sharýashylyq basqarmasynyń saıtyndaǵy jarıalanymda adam faktorymen baılanysty qate ketken. Memlekettik satyp alýlar portalyndaǵy materıaldardy kóshirý kezinde 519 dananyń ornyna 11000 dana dep jazylyp ketken. Qazir osy másele boıynsha qyzmettke tekserý júrýde. Aqparatty burmalaýǵa qatysy barlar tártiptik jazaǵa tartylatyn bolady», - delingen habarlamada.

Hosh. Sonymen, parlamenttiń sharýashylyq jumystaryna jaýapty kásiporyn halyq qalaýlylarynyń tutynýy úshin spırttik ishimdik alynatynyn moıyndady. Tek, sanynan qate ketipti-mis. 11000 men 519-dyń arasy jer men kókteı, árıne. Zań shyǵarýshy organǵa qyzmet kórsetýshiler de sol úshin shyr-pyr bolyp otyr.

Osy jerde taǵy da «chto-to ne to» degizetin taǵy bir jáıtti aıta ketýimiz kerek. Kásiporyn osy habarlamada atalǵan mólsherdegi araq-sharapty satyp alý úshin 2 mıllıon teńgeden artyq qarajat bólingenin jáne onyń respýblıkalyq qazynaǵa qatysy joq, kásiporyn búdjetiniń aqshasy ekenin jazǵan. Dóńgelekteı esepteı salǵannyń ózinde, depýtattar úshin alynatyn árbir shólmekke shamamen 4 myń teńge jumsalatynyn kóresiz. Sol depýtattar qabyldaǵan zańdarǵa saı elimizde alkogóldi ónimderge beriletin aksız baǵasynyń jyldan jylǵa ósip otyrǵanyn bilemiz. Biraq, qazaqstandyq zaýyttardan shyǵatyn araq-sharapty sonshalyqty qymbattady dep te aıta almaımyz. Álde, halyq qalaýlylary «aýyldyń araǵy sasyq» dep sheteldik markalarǵa tapsyrys bergen be?

Jomart Abdollauly