Qazaqtyń jeri jatyr satylǵaly

Búgin bılik bir isti maquldady,

«Qazaq jeri jatypty satylǵaly».

Estimegendi estip-aq kelemiz ǵoı,

Álıhan men Ahmet atylǵaly.

Búgin dalam tym muqtaj arystarǵa,

Albastyǵa ses bolar Arystanǵa.

Alaqandaı pushpaǵyn bermep edik

Eki júz jyl jońǵarmen alysqanda.

Aqtaban bop aıalsyz shubyrǵanda,

Ashtyqtan aq súıek bop qyrylǵanda

Aıyrylmaǵan arshyn tós dalamyzdy –

Anamyzdy satardaı jyn urǵan ba?

Jeri joqty jeteli el jetim deıdi,

Jeri joqtyń jetesi jetilmeıdi.

Essiz urpaq «Satamyn» desin meıli,

Qasıetti qara jer keshirmeıdi.

Quıyńa túsirdiń ǵoı shaıyr batpaq,

Bálkim batyp ólermiz baıyp jatsaq.

Sebebi, eshbir halyq mandymaıdy,

Óz anasyn aqshaǵa aıyrbastap...

Táýelsiz el bolǵan soń taqqa mindiń,

Alty alashtyń torlady aspanyn muń.

Jalǵyz shardy oıynshyq etken elge,

Bir jazasy daıyn tur haq táńirdiń...

Aıta almaımyn bul jerdi satpa dep men,

Aqıqat ta joq múlde haqtan ótken.

Búgin bizdiń sıqymyz ــ jasyl jerdi

Taptap ótken pendeni maqtan etken.

Osy ma edi ordaly el buzylǵanyń,

Báhádúrler, qor boldy qyz-uldaryń.

Egeı jerdi qorǵaǵan esil babam,

Sen satsyn dep tókpegen qyzyl qanyn.

Ózek kúıer órt jatyr óleńimde,

Endi ógeılik kóremin óz elimde.

Qaıran, qaıran qart qazaq qaıdasyńdar?

Jerin qoıyp satpaǵan jelegin de.

Ýdaı ýaıym estini ıektedi,

Ózimdi emes, oılaımyn shıókpeni.

Jermen birge satylyp bara jatyr,

At kótermes atalar súıekteri.

Jaýtań-jaýtań qaraısyń jaraly elim,

Qaımyqpaısyń bilemin qara jerim.

Temir tyrnaq tiledi qyr arqańdy,

Biz bilmeıtin bireýler salar egin.

Eki myń jyl turǵan jer esen – aman,

Búginginiń pıǵyly óte jaman.

Seni týǵan qasterli jer ــ ananyń,

Appaq sútin emedi bóten adam...

Búgin bılik bir isti Maquldady,

“Qazaq jeri jatypty satylǵaly”.

Estimegendi estip-aq kelemiz ǵoı,

Álıhan men Ahmet atylǵaly...

Ádilet AHMETULY

Ádilet AHMETULY 1986 Jyly 25 Qyrkúıekte Qytaı Halyq Respýblıkasy, Altaı aımaǵy, Býryltoǵaı aýdany, Qarmaǵaı aýyly, Tańbaly qystaǵynda týǵan. Bala kezinen ádebıetke asa bir áýespen kelgen Ádilettiń tyrnaq aldy týyndysy - «Qarǵaldaq mahabbat» atty óleńi 2008 jyly Shınjáńdaǵy «Qumyl alqaby» jýrnalynan jaryq kórgennen beri, «Shınjáń gazeti», «Altaı gazeti», «İle jastary», «Shuǵyla», «Mura» syndy el ishi-syrtyndaǵy túrli basylymdarda 50-ge jýyq óleńi, 3 maqalasy, 5 aýdarma shyǵarmasy jarıalanǵan. 2010 jyly qarasha aıynda Qazaqstan Respýblıkasy, Qyzylorada oblysynan shyǵatyn «Syr dıdary» gazetinde «Kósh», «Bóltiriginen bólingen» syndy óleńi basylsa, «Dala men qala» gazetinde de jas aqynnyń óleńderine oryn berilgen bolatyn.

2012 jyly jaz aıynda Qazaqstan «Jazýshy» baspasynan aqyn Esenǵalı RAÝSHANULY qurastyrǵan «San ǵasyrlyq saǵynysh» atty jas aqyndar jınaǵyna «Dáýir osy», «Qara jolda qart ana» qatarly onshaqty óleńi basylǵan. Aqynnyń «Kók baıraq», «Aýylǵa bardym» atty eki óleńi «baq.kz» aqparattyq portalyndaǵy «Jahan qazaqtary» bóliminde jaryq kórgen. «Aq ala ordam qonǵan jurt» atty poemasy Astananyń 15 jyldyǵyna oraı «Qazkontent» aksıonerlik qoǵamy uıymdastyrǵan jyr múshaırasynyń 2 dárejeli júldesin enshilegen. 2014 Jyly atajurtqa oralǵan.