Keshe Beıjiń qalasynda Qytaı-Qazaqstan-Túrikmenstan-Iran baǵdary boıynsha temirjol qatynasynyń tanystyrylymy ótti, - dep habarlaıdy Qamshy.kz QazAqparatqa silteme jasap.

Sharany Qazaqstan men Túrikmenstannyń Qytaıdaǵy Elshilikteri sondaı-aq, «Qazaqstan temir joly» Ulttyq kompanıasy» AQ uıymdastyrǵan. Tanystyrylymǵa 130-dan astam adam qatysty, olardyń arasynda QazaqstannyńQHR-daǵy Elshisi Shahrat Nuryshev, Túrikmenstannyń Qytaıdaǵy Elshisi Chınar Rýstamova, QHR Shensı provınsıasyndaǵy Sıan qalasynyń meri Shangýan Szısın, QKP Lánúngan qalasyndaǵy partıa komıtetiniń hatshysy jáne atalǵan qala ákimshiliginiń dırektory Ý Isáo, «Qytaı temirjoldary» kompanıasynyń vıse-prezıdenti Hýan Mın, Túrikmenstan Temirjol kóligi mınıstrligi marketıń bóliminiń bastyǵy Azat Aryzmedov, «QTJ» UK» AQ-nyń logıstıka jónindegi vıse-prezıdenti Qanat Alpysbaev, QHR SİM-niń ókilderi, sondaı-aq 40-qa jýyq qytaılyq kólik kompanıalary men BAQ qatysty.

«Jibek joly ekonomıkalyq beldeýiniń» eki negizgi kólik dálizi Ortalyq Azıa elderi arqyly ótip jatyr. Birinshisi - Qytaıdan Qazaqstan men Reseı arqyly Eýropaǵa deıin (Baltyq teńizi), ekinshisi - Qytaıdan Qazaqstan men Túrikmenstan arqyly Iranǵa jáne odan keıin Parsy shyǵanaǵyna deıin. Alaıda, atalǵan temirjol dálizderi salynyp, qyzmet etip otyrǵanyn kópshilik bilmeıdi. Bul rette bul baǵyttaǵy baǵdarlar teńiz tasymalymen salystyrǵanda júkterdi jetkizý jyldamdyǵynda óz basymdyǵyn dáleldep shyqty», - dedi óz sózinde Sh.Nuryshev. 

Onyń aıtýynsha, eger Qazaqstan arqyly Eýropaǵa júretin temirjol dálizi tıimdi qyzmet etip otyrsa, Irannan sanksıalardy alý Iranǵa jáne odan keri temirjol tasymaldaryn damytýdyń jańa múmkindikterin ashty.