Búgin Astanada ótip jatqan Qazaqstan halqy Assambleıasynyń HHİÚ sesıasy barysynda Elbasy Nursultan Nazarbaev osylaı málimdedi, - dep habarlaıdy Qamshy.kz.

Prezıdent el arasyndaǵy jer ýchaskelerin sheteldikter ıelenip ketedi degen sybystyń shyndyqqa janaspaıtynyna nazar aýdartty.

«Sońǵy ýaqytta jer máselesine erekshe nazar aýdarylýda. Qazaqstandyqtar arasynda jer shet el azamattaryna satylady degen jalǵan aqparat taraýda. Aýylsharýashylyq jerlerin shetel azamattary men kompanıalaryna satý týraly másele joq, ondaı másele qarastyrylmaıdy da. Bul taqyryptaǵy spekýlásıalardyń bireýi de negizsiz, arandatýshylar anyqtalyp el zańdaryna saı jaýapqa tartylatyn bolady. Tipti, bizden jer alǵan JSHS sheteldik ınvestor tartyp, olarǵa óz aksıasyn beretin bolsa, onda ol jer qaıtadan arendaǵa ótedi. Másele fermerlerge menshik ıelený, jer ıelený múmkindigin berýde bolyp otyr. Biz buǵan deıin jerdi jalǵa alý merzimi 10 jyl bolǵanyn aıttyq. Biraq, bul ýaqyt ishinde sheteldik ınvestorlardyń eshqaısysy salǵan aqshalaryn qaıtara almaıdy. Sondyqtan biz arenda merzimin 25 jylǵa uzarttyq. Salystyratyn bolsaq, Reseıdi bul merzim 49 jyl, BAÁ-de – 99 jyl, Eýropada – 49, 59, 99 jyldy quraıdy. Budan sonsha ne jamandyq kórdińizder? Shýlap júrgender qyrmanda jumys isteıtinder emes, aýylsharýashylyǵynan múldem habarsyz, ol jerlerdiń qaıda ornalasqanyn da bilmeıtinder!», - dedi N. Nazarbaev.

Keshe Elbasy osy máselege qatysty sóz qozǵap, eldiń Bas prokýratýrasyna jerge qatysty zańnamalardy durys túsindirý týraly tapsyrma qoıǵan bolatyn.