Búgin Almaty ýnıversıtetinde Qazaq handyǵynyń 550 jyldyǵyn merekeleý aıasynda Muhammed Haıdar Dýlatı atyndaǵy Qazaqstan tarıhy dárisqanasyn ashý saltanaty men «Qazaq tarıhy jáne Muhammed Haıdar Dýlatı taǵylymy» atty dóńgelek ústel ótkizildi, - dep habarlaıdy Qamshy.kz.

Ótken jyly ýnıversıtettiń Ǵylymı keńesi atalmysh dárisqanany ashý jóninde sheshim qabyldaǵan bolatyn. Sheshim boıynsha dárisqananyń ashylý maqsaty:
"Jas urpaq boıynda Qazaq eliniń «Máńgilik El» jalpyulttyq ıdeıasynyń túp qazyǵy – ulttyq memlekettilik ekenin ǵylymı túrde negizdeıtin tarıhı sana qalyptastyrý".

Mindetteri: 
- "Qazaq memlekettiliginiń eki myń jyldan asa tarıhy bar ekenin jáne osy tarıhı kezeńde bizdiń jerimizde bolǵan barlyq tarıhı prosester barysynda Qazaq handyǵynyń qurylǵanyn túsindirý;

- Jastardyń boıyna ulttyq qundylyqtardy sińire otyryp qazaqstandyq patrıotızmge tárbıeleý; 

- Bahadúr babalarymyzdyń uly muraty – erkindigin saqtaǵan táýelsiz memleket qurý bolǵanyn uǵyndyra otyryp, búgingi táýelsiz Qazaqstannyń bolashaǵy – birlik pen yntymaqta, ultaralyq kelisim men tatýlyqta ekenin nasıhattaý;
Ultymyz úshin eń úlken qundylyq – táýelsiz Qazaqstan ekenin jas urpaq sanasyna sińirý" bolatyn.

Saltanatty sharaǵa Muhammed Haıdar Dýlatı atyndaǵy qoǵamdyq qordyń tóraǵasy, tarıhshy, dýlatıtanýshy baspager-ǵalym Muhtar Qazybek myrza kelip qatysyp, ýnıversıtet ujymy men stýdentterine «Muhammed Haıdar Dýlatıdiń «Tarıh-ı Rashıdı» atty eńbegi: tarıhy jáne taǵylymy» atty taqyrypta tushshymdy baıandamasyn jasap, stýdentterdiń suraqtaryna jaýap qaıtardy. 
Qazaq handyǵynyń qurylýy týraly naqty tarıhı derek beretin jalǵyz ǵana ádebı-memýarlyq janrdaǵy "Tarıh-ı Rashıdı" atty eńbektiń qazaq tarıhynda alatyn orny zor. Al ony jazǵan ǵulama ǵalym, ortasyrlyq iri oıshyl, asa iri memleket jáne qoǵam qaıratkeri Muhammed Haıdar Dýlatı myrzanyń atynda dárisqana ashý - jas urpaqty tárbıeleý men olarda tarıhı sana qalyptastyrý jolyndaǵy ıgi is dep oılaımyz.

Sábıt SHİLDEBAI
Almaty ýnıversıtetiniń rektory, tarıh ǵylymdarynyń kandıdaty.