Ekinshi Dúnıejúzilik soǵys kýágerleriniń estelikterin óz aýzynan estýdiń áseri tipti erekshe. Qostanaıda memlekettik muraǵatynda ardagerlermen júzdesý ótti. Muraǵat qyzmetkerleri maıdannan jazylǵan hattardyń jınastyrylyp jatqanyn, jaqyn kúnderi muraǵatta shań basyp jatpaı jaryqqa shyǵatynyn aıtady,- dep habarlaıdy Qamshy.kz 24.kz-ke silteme jasap.
Búgingi kezdesýdiń basty keıipkeriniń biri – Ivan Bodáev. Ol 1942 jyly 18 jasynda Meńdiqara aýdanynan maıdanǵa attandy. Úsh aı daıarlyqtan ótip, Máskeý túbinde surmergender sapynda soǵysqa kirdi. Lenıngrad shaıqasyna qatysty. «Betpe-bet soǵysta bes fashısiń kózin joıdym», -deıdi ardager. Ol jeńisti Kavkaz jerinde júrip, qarsy aldy. 1949 jyly áskerden bosap elge kelip, kólik júrgizýshi bolyp eńbekke aralasty. «Sum soǵys qaıtyp kelmesin, beıbit kúndi baǵalańdar!», -deıdi qart maıdanger.
Ivan Bodáev, Uly Otan soǵysynyń ardageri:
- Bizdiń elimizde tynyshtyq, alaýyzdyq joq. Odan asqan baqyt bar ma?! Soǵystyń zardabyn tilmen aıtyp jetkizý múmkin emes. Sondyqtan mamyrajaı zamandy qadirleńder! Elimiz ardagerlerge bar jaǵdaıdy jasap otyr, odan artyq ne kerek?! Bizge ystyq yqylastaryń da jetkilikti.
Kezdesýge kelgen qos maıdanger – aýyr jaralanyp, ajaldyń aýzynan aman qalǵan aqjoltaı jandar. Tapsyrmany tyńǵylyqty oryndap, janqıarlyqtyń eren úlgisin kórsetken keshegi jaýyngerlerdiń estelikteri jastardy erekshe áserge bóledi.
Baǵdáýlet Qasymbek, stýdent:
- Ardager kisilerdiń óz aýzynan bolǵan jaǵdaılardy estý – men úshin bir baqyt. Salystyryp qarasaq, bizdiń jasymyzda olar kóptegen qıynshylyq, kóptegen soǵysty kórdi. Qudaı bizge ondaı bermesin! Beıbit ómir súrip jatqandyǵymyz – sol kisilerdiń mańdaı teriniń arqasy.
1941-1945 jyldary Qostanaı oblysynan 73 myńnan astam sarbaz maıdanǵa attandy. Solardyń jartysynan kóbi jat topyraq jastandy, elge oralmady. Oblystyq muraǵat mekemesi jyl saıyn jerles maıdangerlerge qatysty barlyq jádigerlerdi jınap, toptastyrý ústinde.
Ajar Baltaeva, muraǵat qyzmetkeri:
- Muraǵatshylardyń arqasynda kóptegen qujat jınaqtaldy. Iaǵnı úı-úıge kirip, maıdannan kelgen hattardy jınady. Sol hattarǵa qarap otyryp, estelikterin oqı otyryp, ardagerlerdiń soǵysta bolǵan jerleri, sezimderi, úılerine, týǵan-týystaryna degen saǵynyshtary, jalpy Otanyna, eline degen súıispenshiligin baıqaımyz.
Jınalǵan derekter shań basqan muraǵattarda jatyp qalmaıdy. Olardy jaryqqa shyǵarý, jarıalaý isi de jolǵa qoıylǵan. Munyń bári erlikti dáriptep, jastardy otansúıgishtik rýhta tárbıeleý jolynda atqarylyp jatyrǵan jumystar ekeni daýsyz.
