Otandasymyz Qanat Islamnyń kásipqoı bokstaǵy 21-jekpe-jegin «Qazaqstan» Ulttyq arnasy tikeleı efırde kórsetýdi josparlaýda, - dep habarlaıdy Qamshy.kz portaly.  Bul týraly «Qazaqstan» RTRK» AQ baspasóz qyzmetinen habar taratty.

Kásipqoı boks áleminde «Qazaq» atymen tanylǵan Islamnyń bul jolǵy qarsylasy 28 jastaǵy kolýmbıalyq bylǵary qolǵap sheberi Hýan De Anhel.

Basty kezdesýi Islam men De Anhel arasyndaǵy jekpe-jek bolyp tabylatyn reıtıńtik boks keshi 9 mamyr kúni AQSH-tyń Florıda shtatyndaǵy Leıklend qalasynda Astana ýaqytymen tańǵy 07:00-de bastalady.

Esterińizge sala keteıik, kásipqoı boksqa 2012 jyly aýysqan Qanat Islam buǵan deıingi ótkizgen 20 jekpe-jeginiń barlyǵynda jeńiske jetken. Onyń ishindegi 17 kezdesýde otandasymyz qarsylastaryn nokaýtqa túsirgen.

Aıta keteıik, 2011 jyly atajurty - Qazaqstanǵa oralǵan Qanat sol jyly qurylǵan Búkilálemdik boks serıasyndaǵy (WSB) ataqty Astana Arlans  komandasyna qabyldanyp, otandastaryn rıngtegi jarqyn ónerimen qýantady.

Búginde Qanat Amerıka Qurama Shtattarynda jattyǵady. Bapkeri - tanymal amerıkalyq maman Nelson Lopes. De Anhelge qarsy jekpe-jek - Qanattyń kásipqoı bokstaǵy keń aýqymdy telearna kórsetetin alǵashqy kezdesýi.