"Úsh tildi oqytý" taǵy synǵa ushyrady. Búgin bir top zıaly qaýym Bilim jáne ǵylym mınıstrliginiń bastamasyna qarsy shyǵyp, prezıdentke taǵy bir ashyq hat joldady, - dep habarlaıdy Qamshy.kz 31 arnaǵa silteme jasap.
Jalpy bilimdi ózge tilde oqý balalardyń saýatsyzdyǵyna ákeledi degen belsendiler, aǵylshyn tiliniń saǵatyn arttyrsyn degen balama usynyp otyr. Sondaı-aq zıaly qaýym búgin ǵana ofshordan shoty tabylǵan Erlan Saǵadıevty prezıdent aıtsa da, áli kúnge deıin bizben aqyldasýǵa asyqpaıdy dep aıyptady.
Astanadaǵy ǵylym men shyǵarmashylyq salasyndaǵy zıalylardyń bir toby búgin ashyq hattaryn gazet pen ınternetke ǵana jarıalaıtyn dástúrdi buzyp, aqordaǵa ózderi alyp keldi. Basty talap: onsyz da qazaq tiliniń damýy kesheýildep turǵan shaqta jas urpaqty taǵy da tájirıbe obektisine aınaldyrmaý.
"Nege únemi bizge, qazaq halqyna tájirıbe jasaı beredi. 70 jyl sovet odaǵynda únemi bizge eksperıment jasaldy, bul toqtamaıdy ma? 25 jyl ishinde biz balalarymyzdy qazaq qyla almadyq. Endi orys qylamyz ba, aǵylshyn qylamyz ba? Aqylsyzdyq. Sondyqtan bizben nege sanaspaıdy?" , - deıdi "Memlekettik til" qoǵamdyq uıymynyń ókili Jumamurat Shámshi.
Negizgi bilimdi basqa tilde oqytý balalardy saýatsyzdyqqa uryndyrady» deıdi narazy top. Onsyz da bazalyq pánderdi aǵylshyn tilinde oqytatyn maman tapshy, ony túsinetin de oqýshy joq. Sondyqtan zıaly qaýym onyń ornyna aǵylshyn tiliniń saǵatyn arttyryp, kýrstardy mindetteýdi usyndy.
"Malaızıa, Sıngapýr, Fılıppın elderiniń júıesin kóshirip otyrǵan sıaqtymyz. Biraq olar qaıdan shyqty, biz qaıdan shyqqanymyzdy este ustaý kerek. Al biz bodan bolǵanda tilimizden, saltymyzdan aıyrdy. Endi táýelsizdik jyldary qaıta memlekettik tildi damytyp jatqan kezde tutqıyldan úshtuǵyrly tildi júzege asyramyz deý qaıta qalyptasyp kele jatqan memlekettik tildi joıyp alýy múmkin" , - deıdi QR Mádenıet qaıratkeri Qýandyq Shamahaıuly.
Eńbek, sýret, mýzyka pánderinen bir muǵalim berip, «ámbebap ustaz» jasamaqshy mınıstr bastamasynan da belsendiler shoshyp otyr. Mınıstr Saǵadıevtiń ózi "zıalylardyń balalary shetelde aǵylshynsha bilim alady. Qarapaıym halyqtyń balasy nege solar sıaqty aǵylshynsha oqymasqa?" dep, olardyń alǵashqy hatyna qysqasha jaýap aıtqan edi. Al depýtattar mınıstrdiń reformasyn qoldaǵanymen, onyń merzimi jóninen zıalylar pikirimen kelisetindeı.
"Qandaı jumysty burynǵy revolúsıalyq ádispen emes, kókeıge qonymdy evolúsıalyq jolmen júrý kerek. Biz halqymyzdyń úshtildi bolýyn qoldaımyz. Ol jumystyń negizi mektep qabyrǵasynda qalanýy kerektigin qoldaımyz. Merzimi jóninde kóp oılaný kerek, asyǵystyqqa barmaý kerek" degen oı aıtty QR Parlamenti májilisiniń depýtaty Saýytbek Ábdirahmanov.
Depýtat muǵalim aǵylshynsha sabaq bere alý deńgeıine jetkende, oqýshy shet tilindegi dáristi túsine alatyn kezde ǵana reforma jaıynda sóz qozǵaý kerek deıdi. Al kúni keshe aımaqtardy aralap «máńgilik eldi» túsindirip kelgen májilisvýmen Aıgúl Nurkına jańa reformalardy uǵyndyrý úshin eldi-mekenderge qaıta shyǵýǵa qarsy emes eken.
"Suhbat berý bylaı tursyn, aýyl-aımaqty aralyp halyqpen kezdesý tipti basqa. Mınıstr, depýtattar halyq ishin aralap, suraqtaryna jaýap berip, ata-analardyń usynystaryn estip qaıtýy tıis" ekendigin alǵa tartty QR Parlamenti májilisiniń depýtaty Aıgúl Nurkına.
Hatty prezıdentke joldaǵan top Saǵadıevke syn aıtty. Zıaly qaýym prezıdent qansha aıtsa da, mınıstr "bizben aqyldasýǵa tyryspady, habarlaspady" dep renjýli.
