Almaty qalasy OKJ-niń №4 kitaphanasynda 18 mamyr kúni arý qala Almatynyń myńjyldyq mereıtoıyna arnalǵan «Án-jyrym sensiń, Almaty» atty qalalyq tanymdyq baıqaý ótti. Bıyl ár qazaqtyń maqtanyshy men mártebesine aınalǵan Almatynyń 1000 jyldyq mereıtoıy IýNESKO kóleminde toılanýda. Bárimizdiń taǵdyrymyzdyń, bárimizdiń jastyq shaǵymyzdyń, kemel kezimizdiń kýási bolǵan Almatynyń ónegeli ótkeni de, shejireli tarıhy da, búgingi kelbeti de keremet!
Baıqaýǵa arnaıy uıymdastyrylǵan «Qazaǵymnyń mártebesi – Almaty!» atty kórmeniń elektrondy vıdeoprezentasıasy arqyly oqyrmandar elimizdiń mádenı ordasyna aınalǵan, álemge ulttyq naqyshymen, sulý kelbetimen tanylǵan arý qalamyz Almatyǵa ádebı saıahat jasady.
Baıqaýdy uıymdastyrýdaǵy maqsat – myńjyldyq tarıhy bar, táýelsizdigimizdiń altyn besigi bolǵan arman qalamyz Almaty týraly aqyndyq ónerge den qoıǵan jas aqyndardyń úzdik jyrlaryn tańdaý, daryndy óner talanttaryn izdestirý, jas tolqyndardyń poezıa, ónerge degen qyzyǵýshylyqtaryn arttyrý, talaptaryn ushtaý, jastardy Otanyn, óz qalasyn súıýge úndeıtin jaýhar jyrlar jazýǵa yntalandyrý, qalamgerlik sheberlikterin damytý.
Baıqaýǵa qatysqan qalamyzdaǵy joǵary oqý oryndarynyń daryndy jastary: T.Júrgenov atyndaǵy Qazaq Ulttyq Óner Akademıasynyń «Jas qyran» tobynyń quramynda Jańǵabaev Nurbek pen Saılaý Symbat bolsa, Qazaq Qyzdar Memlekettik Pedagogıkalyq Ýnıversıtetiniń «Qos qyzǵaldaq» tobyndaǵy qaısar qyzdarymyz Ábzel Ajar men ómirdiń ár sátinen sabaq alyp júretin Baıymbetova Baqytjamal.
Qasıetti qara shańyraq Abaı atyndaǵy Qazaq Ulttyq Pedagogıkalyq Ýnıversıtetiniń «MýzAlmaty» tobynyń ónerli qyzdary: Tájibaeva Roza men Aıkúmis Bólegen, «Sónbes alaý» tobynyń segiz qyrly bir syrly jigerli jastary Nasyr Ersin men Álip Nurahmet Almaty Ýnıversıtetiniń atynan qatysyp, baq synasty.
Saıyskerlerdiń ónerine baǵa bergen qazylar alqasynyń quramyna: Shakıeva Búbihan Baratqyzy – «Almatykitap» baspasynyń vıse-prezıdenti, Ramazan Ómiráliuly Stamǵazıev – ánshi, Qazaqstannyń eńbek sińirgen artısi, Ámire Qashaýbaev atyndaǵy án baıqaýynyń jeńimpazy, ulaǵatty ustaz, Lázzat Tynyshbaıqyzy Mamedova – Almaly aýdany ákimshiliginiń mádenıet bóliminiń basshysy, Roza Qasymbekqyzy Qabıeva – Almaty qalasy Ortalyqtandyrylǵan Kitaphana Júıesiniń dırektory, Qazaqstannyń eńbek sińirgen qaıratkeri; Serik Qalıev – aqyn, Respýblıkalyq aqyndar aıtysynyń júldegeri shaqyryldy.
Saıyskerler 5 aınalym boıynsha óner kórsetip, synǵa tústi. Elimizdiń túkpir-túkpirinen kelgen daryndy jastar úshin Almaty – arman qala emes, sol armannyń oryndalatyn qalasyna aınalǵandyǵyna kýá bolyp júrmiz.
«Jastyǵymnyń kýási – Almaty» atty alǵashqy aınalymda saıysker toptar arnaıy daıyndalǵan slaıd, vıdeorolıkter arqyly ózderin, bilim ordalaryn tanystyrdy. Jasampazdyqtyń, jasyl jelektiń, máńgilik jastyqtyń ordasyndaǵy ótkizgen ár kúnin baqytqa balaıtyn saıyskerlerimiz ádebı-sazdy kompozısıalar arqyly tanystyrýlaryn kórermenderdiń nazaryna usynyp, ózderiniń bul mereıtoılyq sharaǵa úlken shyǵarmashylyq tartýmen, tereń bilimmen kelgenderin kórsete bildi.
«Almaty, sen bizdi aqyn ettiń» atty merekelik jyr-múshaıra aınalymynda saıyskerler óz shyǵarmashylyqtarynan Almaty qalasynyń mereıtoıyna arnap shyǵarǵan jańa jyrlaryn mánerlep oqydy. «Qos qyzǵaldaq» tobyndaǵy Ábzel Ajar «Mahabbat ordasy» degen shabytty jyryn «Bar ańsarym ózińde bolǵanmenen, Aýylymnan artyq dep túsinbeımin» dep shynaıylyqpen qorytyndylady.
«Jas qyran» tobynyń quramyndaǵy jas aqyn Nurbek Jańǵabaev «Júregime ornatqan beıishimsiń Almaty» degen júrekjardy jyryn oqysa, kóptegen jyr-músháıralarynyń jeńimpazy Roza Tájıeva arman qýyp kelgen Almatynyń ómirindegi orny jaıly «Shahar jaıly jyr» shyǵarmasynda tolǵady. «Sónbes alaý» tobyndaǵy Álip Nurahmet te alyp shahardyń kelbeti men kórkin jyryna arqaý etti. Bir bastaryna myń qýanysh, myń qaıǵy syılaǵan, stýdenttik ómirdiń, aq jarqyn kóńilderdiń ǵajaıyp sátterine kýá bolǵan asqaq qala Almatyǵa otty jyrlaryn arnaǵan jas aqyndar qazaq ádebıetiniń bolashaǵy dep tolyq senimmen aıta alamyz.
Elimizdiń tarıhymen birge jasasyp kele jatqan ońtústik astanamyzdyń ótkeni men búgingi tynysy ár qazaqtyń nazarynda júreri anyq.
Osy oraıda, «Myńjyldyq shahar Almaty» kezeńinde saıyskerler uıashyqtar tańdaý arqyly Almaty qalasynyń tarıhyna, mádenıetine, rýhanıatyna, sáýletine, kóshelerine baılanysty qoıylǵan suraqtarǵa jaýap berdi. Utqyr suraqtarǵa utymdy jaýap bergen saıyskerlerimiz tarıhy tunǵan shejire qala Almaty jaıly ózderiniń tereń bilimderin, tapqyrlyqtaryn kórsete bildi.
«Shabytymnyń shalqyrysyń, Almaty!» atty shyǵarmashylyq báıgede saıyskerler ekran arqyly kórsetiletin tapsyrma boıynsha ózderiniń sheshendik, aqyndyq, tapqyrlyq sheberlikterin, shyǵarmashylyq qabiletterin pash etti.
«Jas qyran» tobyna «Almatynyń keshinde, Alataýdyń tósinde», «MýzAlmaty» tobyna «Bal shyryn alma baǵy bar» taqyryby berildi. «Almaty – astanasy mahabbattyń» taqyryby «Qos qyzǵaldaqtarǵa» buıyrsa, al «Kóktóbeniń etegi – kóktem keshken bir meken» taqyrybyn «Sónbes alaý» toby tańdap aldy. Ár top ózderine berilgen 5 mınýt ýaqyt aralyǵynda báıge sahnasyna birinshi bolyp shyǵýǵa asyqty.
Sheshendik pen jyldamdyqty talap etken bul aınalymda jas ónerpazdar aıanyp qalmady. Biri áýelete án shyrqap, biri aqyndyq qyrymen tanylsa, biri teatrlandyrylǵan qoıylym da qoıyp jatty. Birinshi bolyp sahna tórine «Jas qyran» toby sýyrylyp shyǵyp, arý qalamyz týraly án de shyrqady, jaýhar jyr da oqydy. Bar ónerlerin ortaǵa salǵan órenderimiz sýyrypsalmalyq qasıet boıyna sińgen babalarymyzdyń sara jolyn jalǵaǵandaı áser qaldyrdy.
Ásem qala Almaty jaıly qalam terbemegen aqyn, án arnamaǵan kompozıtor neken-saıaq ekendigi haq. «Ánim sensiń, Almaty» aınalymynda saıyskerler arý qala Almaty týraly ásem ánder oryndady.
Almatyǵa degen aıryqsha súıispenshilik sezimmen oryndalǵan halyqtyń qulaǵyna sińisti bolyp ketken «Saǵyndym Almatymdy» ánin Saılaý Symbat, «Almatym júregimde» ánin Baıymbetova Baqytjamal oryndady. Aıkúmis Bólegen Tursynbek Shapaıdyń «Almaty kúzi» ánin, Nasyr Ersin «Almatynyń túnderi» ánin shyrqap, tyńdarmandardyń qulaq quryshyn qandyrdy.
Kesh aıasynda kórermender júrekterge nur quıyp, jyr syılaǵan, kóńilderge kórkem oı salatyn kelbetti Almatymyzǵa arnalǵan jaýhar jyrlar men Almaty qalasy týraly jaýhar jyrlarǵa shalqyǵan áýen qosyp, árlendire túsken sazgerlerdiń ásem ánderimen de sýsyndady.
Bilim ordasynyń úkilegen úmiti bolyp otyrǵan saıyskerlerdiń jankúıerleri de «Kórermender kórimdigi» atty elektrondy oıyn-vıktorınaǵa belsene qatysyp, Almaty qalasy týraly keremet kitaptar utyp aldy.
Jankúıerlerdiń tarapynan Elemesova Baǵdat, Qasteı Aıdos, Turan Bekarys syndy talapty da talantty jastar kórikti qalanyń mereıtoıyna arnap ánnen shashý shashty. «Almaty túni», «Aı-arý», «Nurly kóktem», «Qazaq eli osyndaı» ánderi barsha kórermenge kóterińki kúı syılady. Marlen Aıt-Aqyn analarǵa arnalǵan óleńin oqyp berdi.
Tanymdyq baıqaýdy kitaphananyń turaqty oqyrmandary, Almaty ýnıversıtetiniń stýdenti Marlen Aıt-Aqyn men Abaı atyndaǵy Qazaq Ulttyq Pedagogıkalyq ýnıversıtetiniń stýdenti Ermek Týleýov júrgizdi.
Talas pen tartysqa toly baıqaý qorytyndysy boıynsha «Sónbes alaý» toby İİİ orynǵa, «Qos qyzǵaldaq» toby İİ orynǵa ıe bolsa, İ oryn «MýzAlmaty» tobynyń qyzdaryna buıyrdy. Bas júldeni «Jas qyran» tobynyń ónerpazdary qanjyǵalaryna baılady. Saıyskerler arnaıy dıplommen, baǵaly syılyqtarmen marapattaldy.
Berekesi men merekesi, tirligi men birligi jarasqan – Almaty. Talaı taǵdyrdy toǵystyrǵan, jalǵyz júrekterdi tabystyrǵan – Almaty. Qýanysh pen shattyqtyń, jastyq penen qarttyqtyń kýási bolǵan – Almaty.
Aqyndarǵa jyr bolǵan, sazgerlerge áýenmen sherter syr bolǵan, asqaq eldiń altyn ordasy, óner men bilimniń, ádebıet pen mádenıettiń oshaǵyna aınalyp, talaı jastyń kókirek kózin ashyp, talantty taý tulǵalardy tárbıelegen, alaqanǵa salyp áldılegen – Almaty.
Mine, osy Almatyny jastarymyz jalyndy jyrlarymen terbep, áýelegen ánderimen áldıledi. Álem tanyǵan ásem qalamyz Almatynyń mártebesi árqashan da bıik bolsyn! Kerbez Alataýdyń kórikti qoınaýynan oryn tepken kórkem Almatynyń árbir tańy araıly, árbir kúni merekege toly bolsyn!
