En dalany at tuıaǵymen dúbirletken Kóne túrkilik álipbı men túrki halyqtarynyń búgingi mádenıetin nasıhattaýǵa arnalǵan bul is-sharada táýelsiz elimizdiń tutastyǵyn bekite túsetin máńgilik muramyz, ejelgi túrki jazýynyń keshegisi men búgingisi talqylanyp, túrkologıadaǵy qordalanǵan máselelerdiń sheshimin tabý joldary izdestirildi.Mádenıet jáne sport mınıstrliginiń Tilderdi damytý jáne qoǵamdyq-saıası jumys komıtetiniń tapsyrysy boıynsha Sh.Shaıahmetov atyndaǵy tilderdi damytýdyń respýblıkalyq úılestirý-ádistemelik ortalyǵynyń uıymdastyrýymen El táýelsizdiginiń 25 jyldyǵyna oraı ústimizdegi jylǵy 20 mamyrda Óskemen qalasynda «Túrki jazbalary men mádenıeti kúnderi» atalyp ótti, - dep habarlaıdy Qamshy.kz.
İs-shara aıasynda S.Amanjolov atyndaǵy Shyǵys Qazaqstan memlekettik ýnıversıtetiniń májilis zalynda «Túrki jazba mádenıeti: tarıhı taǵlym jáne táýelsizdik murattary» atty respýblıkalyq ǵylymı-teorıalyq konferensıa ótkizildi. Konferensıaǵa QR Mádenıet jáne sport mınıstrligi Tilderdi damytý jáne qoǵamdyq-saıası jumys komıtetiniń ókilderi, jetekshi túrkolog-ǵalymdar, óner jáne qoǵam qaıratkerleri men BAQ ókilderi qatysty. Konferensıany S.Amanjolov atyndaǵy SHMQÝ strategıalyq damý jáne ǵylymı jumys jónindegi prorektor, fılol.ǵ.d., profesor B.A.Erdembekov quttyqtaý sózimen bastap, konferensıanyń jumysyna sáttilik tiledi.
Tarıhymyzdyń asa qundy murasy bolyp sanalatyn kóne túrki jazýy men mádenıetin nasıhattaıtyn respýblıkalyq ǵylymı-teorıalyq konferensıanyń patrıottyq rýh pen ulttyq qundylyqtardy kóterýdegi alatyn orny bólek. Túrki jurtynyń álemdik órkenıettegi uly murasy sanalatyn kóne jazba eskertkishterin zerdeleý, kóne túrki tilinen bastaý alǵan alǵashqy jazýdyń paıda bolý tarıhyn kópshilikke jetkizý, túrki dúnıesiniń máselelerin zertteý, álemdik órkenıet úderisindegi túrki halyqtarynyń mádenı jáne rýhanı muralaryn oqyp-úırený, damytý jáne túrki jazý mádenıetiniń keshegisi men búgingisin jas urpaq sanasyna tereń sińirý máselesine arnalyp otyrǵan bul is-sharanyń otandyq túrkologıanyń kúrdeli máselelerin aıqyndaýdaǵy mańyzy zor.
Konferensıaǵa qatysýshylar túrki jazbalaryna qatysty túsirilgen beınesújetti tamashalap, L.N. Gýmılev atyndaǵy Eýrazıa ulttyq ýnıversıtetiniń profesory, f.ǵ.d. Qarjaýbaı Sartqojaulynyń «Qadym uıǵyr grafıkasymen jazylǵan mátin» atty baıandamasyn qyzyǵa tyńdady. İs-sharanyń ekinshi bólimi Shyǵys Qazaqstan oblysynyń ólketaný murajaıyndaǵy lektorııge ulasty. Munda tól muramyz bolyp tabylatyn jazba eskertkishterdiń geografıalyq, mazmundyq jáne dáýirlik mánine arnalǵan ǵylymı-tanymdyq sıpattaǵy dáris oqylady. Konferensıanyń jabylý rásimi retinde usynylǵan konserttik baǵdarlama túrki halyqtarynyń óneri men mádenıetine arnaldy.
