«Astana Opera» baletiniń jetekshi solısi Áıgerim Beketaevaǵa Reseıdiń halyq ártisi Borıs Eıfmannan onyń trýppasymen sáýir aıynyń alǵashqy kúnderi Býdapeshtte, sáýirdiń 15-i men 19-y aralyǵynda Londonda, «Kolızeı» teatrynda ótetin gastról barysynda óner kórsetý jóninde usynys tústi.
Bul týraly «Astana Opera» teatrynyń baspasóz qyzmeti habarlady.
Qazaqstandyq jas óner ordasy Marıın teatryna gastrólmen barǵanda Sankt-Peterbor Memlekettik akademıalyq balet teatrynyń dırektory Borıs Eıfman Áıgerim Beketaevanyń ólip bara jatqan aqqýdyń rólin oınaǵan kezdegi ishki jan dúnıesine, kásibı deńgeıine qaıran qalypty. Buǵan deıin Reseıdiń halyq ártisi «Astana Opera» teatrynyń trýppasymen «Roden» baletiniń tusaýkeserinde jumys jasaǵan, ol kezde názik Áıgerim Beketaeva Kamılla Klodeldi bıledi. Jas ártis eýropalyq sahnalarda da osy róldi oryndaıdy. Oǵan ońaı soqpaıdy, sebebi atalǵan balettiń horeografıasy ádettegi klasıkadan da keremet. Ondaǵy basty keıipker adamnyń denesi jáne onyń múmkindikteri bolyp tabylady. Jetekshi solıske júktelgen jaýapkershilik óte joǵary, birinshiden, bul «Roden» baletiniń Londondaǵy tusaýkeseri, ekinshiden, Borıs Eıfman eshqashan ózge teatrdan ártister shaqyrǵan emes, bul Áıgerim Beketaeva úshin úlken qurmet.
Áıgerim Beketaeva - Almatydaǵy A. V. Seleznev atyndaǵy horeografıalyq ýchılısheniń túlegi. 2012 jyly Varnadaǵy (Bolgarıa) balet ártisteriniń halyqaralyq konkýrsynyń laýreaty atandy, bir jyldan soń - Rýdolf Nýrıev atyndaǵy balet ártisteriniń halyqaralyq konkýrsynyń laýreaty jáne balet ártisteri men horeograftarynyń XII halyqaralyq konkýrsynyń (Máskeý) dıplomanty. Balerına ózi úshin jańa eıfmandyq janrdy ashqanyn jáne qazir aldyna qoıǵan negizgi maqsaty - kemelge kelý, óziniń jetilgenin seziný ekenin jasyrmaıdy. «Men óz keıipkerimniń qandaı sezimde, emosıada bolǵanyn dálme-dál jetkizý úshin ol jaıly kóptegen kitaptar oqydym, fılm kórdim. Óte kóp jumys jasaldy, maǵan deıin bul róldi oınaǵandar sahnadaǵy sezimdi jetkizý maqsatynda sol atmosferany uǵyný úshin júıkesi aýyratyndardyń aýrýhanasyna da arnaıy barǵan». Áıgerim birneshe jyldan keıin onyń Kamıllasy múldem basqa bolatynyn, onyń ósetinin aıtady.
«Astana Opera» baletiniń kórkemdik jetekshisi Tursynbek Nurqalıev «Astana Opera» teatrynyń solıseri ózge elge baryp óner kórsetý úshin qajetti kásibı deńgeıde ekeni asa qurmet, osylaısha teatr álemdegi jetekshi teatrlarmen qatar turatynyn atap ótti.
