Qazaqstanda «Aıalaǵan Astana» balalar án baıqaýynyń irikteý kezeńi jalǵasýda. Bul Astana ákimdiginiń qoldaýymen uıymdastyrylyp otyrǵan pop ánshilerdiń respýblıkalyq dodasy. Baıqaýdy «Destkaıa novaıa volna» jáne reseılik tanymal «ARS» kompanıasy (prezıdenti Igor Krýtoı) uıymdastyrǵanynan bolar, joba joǵarǵy dárejege ıe boldy. Bıyl baıqaýdyń tusaýkeseri 27 naýryz kúni Almaty qalasynda ótti. Búginge deıin Almaty, Taldyqorǵan, Taraz, Shymkent qalalarynda irikteý ótti. Alda áli Qyzylorda, Qostanaı, Oral, Atyraý, Aqtaý, Aqtóbe, Qaraǵandy, Semeı, Pavlodar, Kókshetaý, Petropavlovsk, Astana qalalary kútýde.
Bul aımaqtarda ótken irikteýler týraly bizdiń aldaǵy sandarymyzdan oqı alasyzdar, óıtkeni, ónerpazdardy tyńdaý sáýirdiń aıaǵyna deıin jalǵasady.
«Aıalaǵan Astana» Respýblıkalyq balalar baıqaýy 3 kezeńnen turady: respýblıka boıynsha irikteý, jartylaı fınal, fınal. Fınal 2014 jyldyń 4-6 shildelerinde Astana qalasynyń týǵan kúni qarsańynda ótedi. Ádil qazylar alqasy sońǵy nátıjelerin shyǵarady. Jeńimpazǵa arnaıy aqshalaı júlde 1 mln teńge (óz ónerin ary qaraı damytýǵa), al eń bastysy ózi óneriniń arqasynda «Detskaıa Novaıa Volna» Halyqaralyq án baıqaýynda Qazaqstan atynan qatysý múmkindigine ıe bolady. Joba ereksheligi – úlken masshtabta elimizdiń túkpir-túkpirinen daryn ıelerin izdeý. İrikteýge qalalardan bólek, aýdan, aýyl turǵyndary qatysa alady. Baıqaý uıymdastyrýshylary qatysýǵa tilek bildirgen kez-kelgen qatysýshyǵa óz ónerin kórsetýge jaǵdaı jasamaq. Baıqaýǵa 8-12 jas aralyǵyndaǵy ónerpazdar qatysa alady.
İrikteý kezeńi Qazaqstannyń 16 qalasynda ótedi. Qatysatyn jas ánshilerdi halyqaralyq jáne respýblıkalyq baıqaýlar arqyly tanylǵan, Qazaqstan estradasynyń juldyzdary irikteıdi. Olar: Batyr Baınazarov, Saltanat Baqaeva, Ásem Kópbaeva, Gúlnur Orazymbetova, Ivan Breýsov, Almas Kishkenbaev, Marjan Arapbaeva, Álisher Kárimov, Móldir Áýelbekova, ADAM, Danıar Ótegenov, Anel Arınova t.b.
«Aıalaǵan Astana» - bolashaqta elimiz maqtan tutatyn daryndy jas ánshilerdi tárbıeleýge arnalǵan balalar baıqaýy. Joba maqsaty – respýblıka boıynsha ónerli jas jetkinshekterdi anyqtap, olardyń ary qaraı shyǵarmashylyq qabiletteriniń damýyna, ósýine úles qosý. Byltyrǵy baıqaý jeńimpazy kókshetaýlyq Bolat Batyrbaev edi.
Torǵyn Ábýshahman
