Qazaqstandyq tanymal saıasatker Erlan Qarın el úkimetiniń otstavkaǵa ketýiniń sebepterin ózinshe saraptap otyr. Tengrinews.kz portalyna bergen suhbatynda ol Másimov basqaratyn jańa mınıstrler kabınetinde oryn alýy múmkin ózgerister jaıynda da aıtyp berdi.

Saıasatkerdiń aıtýynsha, Ahmetovtyń otstavkaǵa ketýi «Qazaqstan-2050» Strategıasyn júzege asyrýǵa tyń serpin berýmen baılanysty. «Biz óz damýymyzdyń jańa kezeńine, ıaǵnı strategıany júzege asyrýdyń alǵashqy jylyna aıaq bastyq. Alǵashqy bastamanyń qandaı bolatyny, qandaı baǵytqa qaraı bet alatynymyz óte mańyzdy. Meniń oıymsha, Ahmetov basqarǵan úkimet osynaý strategıanyń júzege asýyna qajetti deńgeıde serpin bere almady. Al, Úkimet dál bizdiń jaǵdaıda uıymdasqan túrde jumys isteı alýy kerek» dedi Qarın. Ol búginde álemdik ekonomıkalyq naryqtaǵy konúktýranyń ózgergendigin aıtyp otyr. Saldarynan naqty qaýip paıda bolýda. «Keri faktorlardyń áseri belgili bir deńgeıde tıip otyr. Ásirese, sońǵy devalvasıa kezinde baıqaldy. Reseı tóńiregindegi jaǵdaı, túrli syrtqy faktorlardyń keri áseri úkimettiń ekonomıkalyq saıasatyn júzege asyrýda ózgeristerdi qajet etedi» dep túıindedi ol sózin. Qarınniń pikirinshe, Serik Ahmetov basqarǵan mınıstrler kabınetiniń eń basty kemshiligi – Prezıdent Joldaýyn júzege asyrýda naqty baǵdarlamalardy jasaı almaǵanynda. «Keshegi mınıstrler kabınetiniń saıası da, ekonomıkalyq ta, tehnologıalyq ta turǵyda múmkindikteri mol boldy. Onyń ústine, dál osy úkimet tusynda Elbasy halyqqa eki Joldaý arnady. Olardyń birinde «Strategıa-2050» aıtylsa, ekinshisinde «Máńgilik el» taqyryby sóz boldy. Ahmetovtyń komandasyna Prezıdenttiń eń mańyzdy tapsyrmalary júkteldi. Biraq, olar óz jumystaryn júıeleı alǵan joq. Prezıdenttiń strategıasyna jaýap retinde úkimet jańa konsepsıa, jospar ázirleýi tıis edi. Máselen, onyń aldyndaǵy Másimov basqarǵan mınıstrler kabıneti antıkrızıstik baǵdarlama jasap shyǵaryp, ony júzege asyra bildi. Ahmetovtyń komandasy da dál osylaı óz baǵdarlamasyn jasap, ony oryndaýy tıis bolatyn. Meniń oıymsha, qazir Másimov jańa mınıstrler kabınetimen Strategıany júzege asyrýǵa arnalǵan jańa jospar ázirleıdi. Ol sala-salany jeke qamtıtyn jospar bolýy ábden múmkin» dedi E.Qarın óz sózinde. Saıasatker sondaı-aq, jańa mınıstrler kabınetinde oryn alýy múmkin ózgerister jaıynda da aıtyp berdi. «Bul jaıynda dóp basyp aıtý qıyn. Tipti, mınıstrler jappaı aýysqanymen de elde úlken ózgerister bolmaıdy. Máselen, ózge elderde mınıstrler kabıneti aýyssa jurt eń aldymen bılikke qaı baǵyttaǵy tulǵalardyń keletinine mán beredi. Bizdiń jaǵdaıda da úlken ózgeristiń bolmaıtynyna senemin. Jańa mınıstrler taǵaıyndalsa da olar bılikte burynnan júrgen tulǵalar bolady. Damýdaǵy serpindi kúsheıtý úshin keıbir salalarda ózgeris bolýy múmkin. Máselen, densaýlyq saqtaý jáne bilim berý salalary» dedi ol. «Prezıdent jańa premer-mınıstrdi taǵaıyndaǵan kezde halyqaralyq ınstıtýttarmen, syrtqy ınvestorlarmen ózara baılanystaǵy jumystardy kúsheıte túsý kerektigin atap ótti. Bul rette Másimovtyń ózge kandıdattarǵa qaraǵanda múmkindigi mol. Ol syrtqy aýdıtorıaǵa – kásipkerlerge, halyqaralyq qarjy, ekonomıka qurylymdarynyń ókilderine óte tanymal tulǵa. Másimovtyń osynaý baılanystary, tájirıbesi Qazaqstanǵa paıdasyn ákelýi tıis» dedi Qarın. Saıasatkerdiń aıtýynsha, jańa úkimet túrli qurylymdardy qaıta jasaqtap, múmkindikterdi qaıta qarap shyǵady. «Másimovtyń burynǵy tájirıbesinen baıqaǵanymyz, ol jumysty ońtaılandyryp, jańǵyrtýǵa beıim. Naqty bir deńgeıde jumys qarqynynyń deńgeıi ózgeredi. Ol buryn mınıstrler kabınetin basqarǵan kezde jumysqa ózin tolyqtaı arnaıtyn, tipti, tıisti demalysyn da almaı eńbek etti. Ol mınıstrlikterdiń barlyq alqaly otyrysyna qatysyp shyqqan jalǵyz premer. Endi úkimet osyndaı daǵdyǵa qaıta oralady dep bilemin» dep sózin qorytty Erlan Qarın.