Qazaqstanda dızel otynynyń baǵasy 115 teńgege deıin  qymbattaıdy, - dep habarlaıdy Qamshy.kz KTK arnasyna silteme jasap.

Taryqtyryp baryp, baǵany kóteretin tásil dızel qunyn da aqyry kóterip tyndy. Energetıka mınıstrligi osy suıyq otyn túriniń baǵasyn baqylaýdan bas tartyp, erkine jibermek. Qazirdiń ózinde ol 115 teńgege deıin kóterilgeli jatyr. Endi bárin naryq retteıtin bolǵandyqtan baǵanyń munymen toqtamasy da anyq. Sheneýnikter osylaısha dızel tapshylyǵyn sheshemiz degen senimde. Óıtkeni, salystyrmaly túrde arzan otyndy orystar men qyrǵyzdyń kásipkerleri tasyp qoımaı jatyr eken.

Elimizde áıelder qaýymy tosap jabýǵa qant izdep sabylsa, iri júk kóliginiń qojaıyndary úshin dızel naǵyz sary ýaıym bolyp tur. Uzaq jolǵa shyqqaly turǵan júrgizýshiler baǵanyń qymbattaıtynyn estip, kóńilderi túsken.

Erbol Beısenbaev, kólik júrgizýshisi:

-Dızel kóterilse, azyq-túlik bári qymbattap ketedi. Bul biz sıaqty tasymalmen kúnin kórip otyrǵandarǵa qıyn. Onyń ústine dollar da qymbattap jatyr. Maǵan deseń 200 teńge qylsyn. Sharshatty ábden.

Aı basynan elimizdiń birneshe óńirinde  bastalǵan shýdan sheneýnikterde sharshaǵan. Olar beketterdegi uzyn sonar kezekti orys pen qyrǵyz júrgizýshilerinen kóredi. Sebebi Reseıde suıyq otynnyń lıtri 185, Qyrǵyzstanda 150 teńge eken. Qazaqstanda  99 teńge! Sondyqtan olar shekaralas aımaqqa júk kóligimen birneshe ret kelip, baktaryn qalaýynsha toltyryp alady. Tapshylyqtyń da sebebi sodan degen Energetıka mınıstrligi  endi dızel baǵasyn retteýden bas tartyp, óz erkine jibermek. Onysy birden 16 teńgege kóterilgeli jatyr.  

Áset Maǵaýov, QR Energetıka mınıstriniń orynbasary:

-Reseıden ımporttaýǵa májbúr bop jatyrmyz. Dızeldi ákelýshilerge jaǵdaı jasaý úshin baǵany  kóterý kerek.Bizdiń ekspertterdiń baǵalaýy boıynsha, dızeldiń quny 115-teńgege deıin ósýi múmkin. Biraq qysta, ózimizdiń munaı óńdeý zaýyttarynan shyǵatyn dızeldi otynynyń baǵasy tómendeýi múmkin. Qysqa qaraı. Óıtkeni,qysta tutynýshylardyń paıdalanýy azaıyp ketedi.

Energetıka mınıstrliginiń qundy retteýden bas tartý týraly buıryǵy erteń kúshine enetinin eskersek, janarmaı beketterindegi tablo dereý ózgerip shyǵa keletini aıan. Eski baǵany bekettegiler qazirden-aq óshirip tastapty. Al ishki naryqta suıyq otynnyń tapshylyǵyna qaramastan, ony tonnalap áketip jatqan Reseı men qyrǵyz júrgizýshilerine eshkim tyıym sala almaıdy. Óıtkeni, Eýrazıalyq Odaqtyń sharty sondaı. Sondyqtan tapshylyqty jalǵyz júrgizýshiler emes, dál qazir egin oryp jatqan sharýalar da kórýi yqtımal. Áıtse de, Esildiń sol jaǵalaýyndaǵy atqaminerler dıqandar qınalmaıdy dep sendirip otyr.

Áset Maǵaýov, Energetıka mınıstriniń orynbasary:

-Aýyl sharýashylyǵyna390 myń tonna otyn bólip jatyrmyz. Baǵasy 79 teńge bir lıtrge. Zaýyttan ózderi tasymaldap alyp ketý kerek.

Mınıstrlik byltyr benzındi óz erkine jibergen soń baǵa turaqtaldy deıdi. Al dızeldiń qolda bary kórshilerimizge ketip jatqanymen, onyń orny tolmaı jatyr. Endi bar úmit Reseıde. Alaıda, Máskeýde dızeldiń tasymalyna salynatyn aksız ben salyq joǵary.

Onyń ústine tamyz aıynan bastap qarashaǵa deıin Pavlodar men Shymkenttegi munaı óńdeý zaýyttary jóndeýge jabylǵaly jatyr. Sondyqtan sheneýnikter eldegi dızel qory jetkilikti degenimen, tapshylyq qyrkúıek pen qazan aıynda da jalǵasýy múmkin. Buǵan jol bermes úshin Energetıka mınıstrligi oblystarǵa jóneltilip jatqan suıyq otynnyń kólemin qadaǵalaýǵa kóshken. Sondaı-aq, baǵamen oınaýǵa áýes jekemenshik maı quıý beketteri men alypsatarlardy jazalaýǵa kiristi.