Búgin Almaty qalasynyń Jetisý aýdandyq 2-sotynda "Baraholkadaǵy" "Olja" bazarynda 2013 jyly kúzde bolǵan órtke qatysty sot úkimi shyqty. Azattyq tilshisiniń habarlaýynsha, sýdıa Gúlnára Músirepova "Olja" bazaryn jalǵa alýshy Janat Qaıranovty "otpen abaısyz jumys isteý saldarynan aýyr zardaptarǵa ákep soqqan bóten adamnyń múlkin joıý nemese búldirý" baby boıynsha aıypty dep taýyp, úsh jylǵa bas bostandyǵyn shekteýge úkim shyǵarǵan. Al "Olja" bazarynyń dırektory Musaǵalı Aldabergenovke "órt qaýipsizdigi erejesin buzdy" degen aıyppen tórt jylǵa bas bostandyǵyn shekteý jazasy taǵaıyndaldy. Sýdıa buǵan qosa konteınerleri órtengen saýdagerlerdiń órtten kelgen shyǵyndaryn óteý týraly talap-aryzyn azamattyq tártip boıynsha qaraýǵa qaldyrdy. 2013 jyldyń qyrkúıeginde «Baraholkanyń» «Olja» bazarynan bastalǵan órt japsarlas «Aıan», «Keremet» jáne «Aıagóz» bazarlaryn sharpyǵan. Tótenshe jaǵdaılar qyzmetiniń málimetinshe, sol kúni 5400 sharshy metr aımaq otqa oranyp, jarty kúnde ázer sóndirilgen.

Azattyq radıosy