Qazynaly Qaraǵandy 15 sáýir kúni ǵashyqtar kúnin toılamaq.
Qozy Kórpesh-Baıan sulý kúnine oraı Qaraǵandy qalasynda «Sezim degen – oı men sana bıiginde túıisý» atty konsert ótkizilmek. Shara barysynda «Sezim haty», «Eń úzdik jup» foto-baıqaýy uıymdastyrylǵan. Qaraǵandylyq jastar ózderiniń ǵashyqtaryna jazǵan hattaryn jáne súıiktilerimen birge túsken sýretterin joldaýda. Jeńimpazdar 15 sáýir kúni ótetin gala-konsertte baǵaly syılyqtarmen marapattalatyn bolady.
Osydan birneshe jyl buryn ulttyq rýhy bıik jastar áýlıe Valentın kúnin toılaýǵa tosqaýyl qoıyp, oǵan balama retinde mahabbattyń sımvolyna aınalǵan Qozy men Baıan merekesin atap ótýdi qolǵa ala bastady. Sodan beri jastar boıynda eljandylyq sezimin arttyrý, uly sezim – mahabbatty asqaqtatý maqsatynda Qaraǵandy qalasy ǵashyqtar kúnin atap ótýdi ıgi dástúrge aınaldyrǵan. Bul shara «Qaraǵandy – orystanǵan meken» degen jansaq pikirden arylý kerektigin taǵy bir márte dáleldeıtindeı. Esterińizge sala ketetin bolsaq, bul merekeni atap ótýdi birinshi bolyp respýblıka kóleminde Ońtústik Qazaqstan oblysynda 1999 jyly qoǵam jáne memleket qaıratkeri, qazirgi Qazaqstan Respýblıkasy Ulttyq murajaıynyń dırektory Darhan Myńbaı usynǵan edi. Al Qaraǵandy qalasynda alǵash ret ǵashyqtar kúni belgili jýrnalıs, satırık marqum Martbek Toqmyrzanyń muryndyq bolýymen toılandy. Sodan bastap resmı negizde eshqaıda jazylmaǵan atalmysh meıram jyl saıyn dástúrli túrde merekelenýde.
Pikir qaldyrý