BUU Aleppoǵa gýmanıtarlyq kómekti jetkizýge arnalǵan úsh saǵattyq «tynyshtyqty» jetkiliksiz dep sanaıdy. Bul týraly halyqaralyq uıymnyń «Jańalyqtar ortalyǵy» habarlaıdy. BUU-nyń Sırıa jónindegi arnaıy ókili Staffan de Mıstýra pen onyń gýmanıtarlyq isterge jaýapty kómekshisi Ian Egelann Aleppoǵa gýmanıtarlyq kómekti jetkizýge jáne qaladan jaralanǵandar men naýqastardy shyǵarýǵa úsh saǵattyq «tynyshtyq» azdyq etetindigin málimdedi. Olar BUU-nyń atalmysh eldi mekende «gýmanıtarlyq úzilisti» aptasyna 48 saǵat kóleminde ornatýdy usyndy. Staffan de Mıstýra Sırıadaǵy qarýly qaqtyǵystardyń jalǵasýyna alańdaýly ekenin jetkizdi. BUU-nyń arnaıy ókiliniń oıynsha, bul qaqtyǵystar Sırıa shıelenisin áskerı jolmen sheshýge bolmaıtyndyǵyn taǵy da dáleldep otyr.
BUU-nyń arnaıy ókiliniń málimdeýinshe, búginde Jenevada AQSH pen Reseı ókilderi arasynda «gýmanıtarlyq úziliske» qatysty keńes ótýde. Staffan de Mıstýra men Ian Egelann Aleppoǵa kómek kórsetý maqsatymen baratyn gýmanıtarlyq uıymdardyń qyzmetkerleri men júk kólikteri qalaǵa jetip, odan aman-esen shyǵýy úshin aptasyna 48 saǵattyq qajet ekendigin atap aıtty. Sondaı-aq BUU ókili joly buzylǵan aımaqtan kómek júgi tıelgen avtokólikterdiń júrýi úshin de úsh saǵat ýaqyt azdyq etetindigin ashyp aıtty. Búginde BUU Aleppoǵa gýmanıtarlyq júkterdi Túrkıa arqyly tasýda.
