Búgin Rıo Olımpıadasynda óner kórsetken 56 kelidegi ırlandıalyq boksshy Maıkl Konlon shırek fınalda tóreshilerdiń sheshimen reseılik Vladımır Nıkıtınnen utylyp qaldy. Biraq bul sheshimge 2015 jylǵy álem chempıony kelisken joq. Kezdesýden keıin tóreshilerdiń satylyp ketkenin aıtyp suhbat berdi. Óziniń tvıtterdegi paraqshasynda Reseı Federasıasynyń prezıdenti Vladımır Pýtınge: «AIBA-ǵa qansha aqsha tólediń? - degen saýal tastady, - dep habarlaıdy Qamshy.kz. baq.kz – ke silteme jasap.

«Meni endi Olımpıada oıyndarynan kórmeısizder. Jalpy Halyqaralyq áýesqoı boks qaýymdastyǵy (AIBA) ótkizetin týrnırlerge qatyspaýǵa keńes beremin. Olar jemqorlar. Naǵyz jemqorlar. Barlyǵy satylyp ketken. Áýesqoı boks basynan baqaıshaǵyna deıin jemqorlyqqa malynyp ketken. Ol jerde naǵyz urylar otyr. Qandaı jaǵdaı bolmasyn men ózimdi jeńildim dep sanamaımyn. Jeńimpaz retinde qala beremin. Tek búgin men bul uıymnyń qanshalyqty satylyp ketkenin barsha álemge kórsettim», - deıdi Konlan.

Konlon London Olımpıadasynda 52 kelide qola júldeger atanǵan. Al byltyr Dohadaǵy álem chempıonatynda 56 kelide álem chempıony atanǵan boksshy.

Kezdesýden soń tóreshiler otyrǵan jerge baryp, óziniń renishin aıtyp ketken boksshy keıinnen tvıtterdegi paraqshasynda Reseı prezıdenti Vladımır Pýtınge «AIBA-ǵa qansha aqsha tólediń? dep saýal tastady.

Al, Reseı quramasynyń bas bapkeri Aleksandr Lebzák bolsa shákirtin jeńildi dep sanamaıdy.

«Búgin Reseı quramasynan Vladımır Nıkıtın men Vıtalıı Dýnaısev jekpe-jekterin ótkizdi. Volodá ótken kezdesýde basy jarylǵan. Soǵan qaramastan ol naǵyz jaýynger jigit. El úshin, medal úshin rıngte ólýge daıyn jigit. Bizde bir altyn bar. Ol kezdesýde eki raýndta utyp, úshinshisinde jeńildik. Mende sýbektıvti pikir qalyptasqan. Ár sportshym úshin jankúıermin», - deıdi Lebzák.