Almatydaǵy Almaly aýdandyq İİB men UQK departamentine shabýyl jasalǵaly da bir aı ýaqyt ótti. Qandy oqıǵaǵa qatysty R. Kúlikbaev qolǵa túskenimen, atalǵan istiń kúmándi hám túsiniksiz tustary az emes. Qala turǵyndary ǵana emes, tutastaı respýblıka jurtshylyǵy polısıanyń jalǵyz qylmyskerge tıisti toıtarys bere almaýyn san-saqqa júgirtip, ózinshe jorýda. İshki ister organdary qyzmetkerleriniń kásibı deńgeıine de syn aıtqandar boldy.
Soǵan qaramastan quzyrly organdar qoǵamda úlken rezonans týǵyzǵan, tutas el kóz tikken osy oqıǵaǵa qatysty tolyq málimet taratyp, elge bolǵan jaıdy jan-jaqty túsindirýge, túrli alyp-qashpa áńgimelerdiń aldyn alýǵa qulyqsyz sıaqty. Oqıǵa bolǵan kúngi baspasóz habarlamasy men odan keıingi shýly isti Bas prokýratýra qyzmetkerleri qaraýyna alǵany týraly qurǵaq aqparattan basqa bul taqyrypta tolyqqandy málimet taramady. Kerisinshe radiotochka.kz saıty qala prokýratýrasy qalalyq İİD –niń ishki qaýipsizdik basqarmasyna R. Kúlikbaev isi boıynsha tergeý málimetteriniń ashyq derekkózderde jarıalanyp ketýi jóninde qyzmettik tekseris júrgizýdi tapsyrǵanyn jazady.
Esterińizde bolsa, R. Kúlikbaevtiń tergeý kezinde polısıaǵa bergen jaýaptarynyń birqatary aqparat quraldarynda jarıalandy. Qandyqol Kúlikbaevtiń «Polısıa ǵımaratynda temir esik bolmaǵanda, budan da kóp polıseıdi jaıratar em» degen sózin Qamshy.kz portaly da jarıalaǵan bolatyn.
radiotochka.kz tilshileri prokýrorlar naqty qandaı málimet boıynsha polısıa qyzmetkerlerin tekserip jatqanyn óz kúshterimen anyqtapty. Ol «Vremá» gazetinde 27 shilde kúni jarıalanǵan jýrnalıs Toqnıaz Kúshikovtiń «Rýslan Kúlikbaev: Ańshylyq tájirıbem bar» degen maqalasy eken. Onda avtor Kúlikbaevtiń túzeý mekemesine qalaı túskeni, kolonıadaǵy tártibi, buǵan deıingi qylmystyq jaýapkershilikke tartylýy, túrmeden shyqqannan soń tıisti organdardyń baqylaýynan sytylyp shyǵýy jáne sońǵy qylmysy úshin tergeýshilerge bergen birqatar jaýaptaryn jarıalaǵan bolatyn. endi qalalyq prokýratýra maqalada aıtylǵan derekterdi jýrnalıske jetkizgen polısıa qyzmetkerin anyqtaýdy talap etip otyr.
Alaıda, prokýrorlardyń shamyna tıgen maqala avtory óziniń mundaı tekserý bastalǵanynan habarsyz ekenin aıtqan.
«Bul týraly birinshi ret estip otyrmyn. Sońǵy ýaqytta meni eshkim İİD-ge shaqyrmady. Atalǵan jarıalanym boıynsha eshkim, ne telefon arqyly, ne elektrondy poshta arqyly habarlaspady. Kúlikbaev isi boıynsha málimetterdi men ashyq kózderden jáne ózimniń derekkózderimnen aldym. Aqparat surap UQKD-ge, İDD-ge barmadym. Eger, İshki qaýipsizdik basqarmasyndaǵylar meniń maqalama qyzyǵýshylyq týǵyzsa, onda ol jarıalana sala habarlasar edi ǵoı», - deıdi T. Kúshikov.
Qaı jaǵynan alsańyz da bul iste elge jan-jaqty málimet jetkizip, kóptiń kókeıindegi kúdikti seıiltýden góri, barynsha búrkemelep, jasyryp-jabýǵa múddelilik baıqalatyn sıaqty. Al, ondaı qupıalylyq kimge qajet, jeke adamnyń ómiri men densaýlyǵyna emes, tutastaı qoǵamdyq qaýipsizdikke qater tóndirgen oqıǵanyń el nazarynan tys zerttelýine kim múddeli, ol jaǵy taǵy belgisiz.
Jomart Abdollauly
