Búgin - 20 tamyzǵa qaraǵan túni saǵat 03:30-da aýyr atletıkadan Qazaqstannyń ulttyq quramasynyń ókilderi bul kúnderi Brazılıanyń Rıo-de-Janeıro qalasynda ótip jatqan XXXI jazǵy Olımpıadasynan Almatyǵa oraldy, - dep habarlaıdy Qamshy.kz QazAqparatqa silteme jasap.
Ońtústik astananyń Halyqaralyq áýejaıynyń VIP-termınalynyń aldynda ziltemir kóterýden 77 kelige deıingi salmaq dárejesinde Rıo Olımpıadasynyń chempıony 23 jastaǵy Nıjat Rahımovty, kúmis júldeger 22 jastaǵy Jazıra Japparquldy (69 kelige deıingi salmaq), qola júldegerler: 23 jastaǵy Karına Gorıcheva (63 kelige deıingi salmaq) men 25 jastaǵy Farhad Harkıdi (62 kelige deıingi salmaq), sondaı-aq, besinshi oryn alǵan 24 jastaǵy Margarıta Elıseeva (48 keli) men 4-shi oryn alǵan 24 jastaǵy Chonteı Arlıdi (56 keli) sport salasyndaǵy uıymdardyń ókilderi, ziltemirshilerdiń týǵan-týystary, týǵan óńirinen kelgen delegasıalar, jas sportshylar, qala turǵyndary - barlyǵy 300-den astam adam zor qýanyshpen qarsy aldy.
Qoldaryna transparanttar, plakattar men Qazaqstannyń ulttyq Týyn ustaǵan júzdegen jastar Olımpıada júldegerleri VIP-termınalynan kóringen bette «Nıjat - chempıon», «Alǵa, Qazaqstan!» «Jazıra - chempıon» dep urandady.
«Maǵan Olımpıada barysynda qyzý qoldaý kórsetkenderińizge shyn júrekten alǵysymdy bildiremin. Bul tek meniń ǵana jeńisim emes. Bul - búkil Qazaqstannyń jeńisi! Meni Olımpıadada tabysty óner kórsetýime úles qosqan jattyqtyrýshyma, ákeme, basqa da azamattarǵa shyn júrekten alǵysymdy bildiremin. Men bul aıtýly dodadaǵa tyńǵylyqty daıyndaldym. Jeńiske jetkenime baqyttymyn! Men úshin Qazaqstan atynan óner kórsetip, el namysyn qorǵaý - asa úlken mártebe», - dedi N. Rahımov.
Aıta ketelik, Rıo Olımpıadasyna Qazaqstannan 104 sportshy 26 sport túrinen óner kórsetti. Qazirgi tańda qazaqstandyq atletterdiń qorjynynda 6 sport túri boıynsha 17 medal bar: 3 altyn, 5 kúmis jáne 9 kúmis. Osylaısha, 2016 jyldyń 20 tamyzyndaǵy jaǵdaı boıynsha 1996 jylǵy Atlanta Olımpıadasynan beri táýelsiz Qazaqstanda Olımpıada chempıondarynyń sany 19-ǵa jetti.
