Rıo tórinde top jarǵan sportshylardyń sońy elge oraldy. Olımpti baǵyndyrǵan boksshy Danıar Eleýsinov, júldegerler Vasılıı Levıt, Ádilbek Nıazymbetov, Ivan Dychko jáne Gúzel Manúrovany  Astana jurty tún jarymǵa qaramastan ystyq yqylaspen qarsy aldy. Qala ákimi de chempıondardyń qasynan tabylyp, olarǵa baǵaly syılyqtar tabys etti. Elorda atynan shyqqqandar tipti tap sol jerde tartý etilgen qymbat kólikterin úılerine minip ketti. Al áýejaı aldyna arnaıy sahna qurylyp, jankúıerler alańǵa syımaı qaldy, - dep habarlaıdy Qamshy.kz KTK arnasyna silteme jasap.

Bul – elge jeńispen oralǵan olımpıadashylardy syrtta taǵatsyzdana kútken astanalyqtar. Tún jarymǵa qaramastan tátti uıqysyn qıyp kelgen jurttyń qarasy qalyń. Al áýejaı ishinde sportshylardyń tek et jaqyndary men qaptaǵan tilshiler ǵana. Danıar Eleýsinovtiń sýretin ustaǵan balǵyn da ákesin kórýge asyǵyp tur. Olımpti baǵyndyrǵan batyrlar da kóp kúttirmeı jetip, birden syrttaǵy sahnaǵa bet aldy.

-Sport juldyzdaryn qarsy alǵanymyzǵa qýanyshtymyz. Dý qol shapalaqpen qarsy alaıyq.

Elge oralǵan sportshylar arasynda altyn alǵan boksshy Danıar Eleýsinov, kúmis júldegerler – boksshylar Ádilbek Nıazymbetov, Vasılıı Levıt, balýan Gúzel Manúrova, qola júldegerler – boksshylar Ivan Dychko, Darıǵa Shakımova, balýandar Elmıra Syzdyqova jáne Ekaterına Larıonova. Jeńimpazdardy jankúıerlermen birge qala ákimi Áset Isekeshov te qarsy alyp, Elorda atynan shyqqan Eleýsinov, Manúrova jáne Levıtke elıtalyq páter syılaıtynyn aıtyp, qymbat kóliktiń kiltin tabystady. 

Al elge maqtanyshpen oralǵan sportshylardyń, árıne, qýanyshynda shek joq. Qoldaý bildirgen jankúıerlerge alǵys aıtyp, qatty tolqyp ketti.

Danıar Eleýsinov, Rıo-de-Janeıro Olımpıadasynyń jeńimpazy:

-Assalaýmaǵaleıký,m jınalǵan qaýym! Qoldaýlaryńyzǵa rahmet kóp-kóp. Jankúıer bolǵandaryńyzǵa. Sezindik muhıttyń arǵy jaǵynda bolsaq ta. Jeńiske jetýge múmkindik jasap otyrǵan Elbasyǵa myń da bir alǵys.

Gúzel Manúrova, Rıo-de-Janeıro Olımpıadasynyń kúmis júldegeri:

-Túngi ýaqytqa qaramaı bizdi kútip alǵandaryńyzǵa rahmet. Sizderdiń qoldaýlaryńyzdyń arqasynda osy medaldarǵa qol jetkizdik.

Osylaısha, Astana áýejaıynda tań atqansha tynym bolǵan joq. Iin tiresken jurt Rıo tórinde top jarǵan chempıondardan qoltańba alyp, sýretke túsýge talasty.

Qaptaǵan jankúıerdiń astynda qala jazdaǵann sportshylar keıin syıǵa alǵan qymbat kólikterin kórsetti. Súlikteı qara jıp Danıarǵa, qalǵan sur tústi ekeýi Vasılıı men Gúzelge tıesili. Biraq olar úshin qazir jaqyndarymen qaýyshyp, úıde tynyǵý mańyzdy. Sondyqtan árqaısysy syıǵa alǵan kólikterine otyryp, úılerine tarap ketti.