Rıo Olımpıadasynyń kúmis júldegeri Vasılıı Levıt taıaý ýaqytta reseılik Evgenıı Tıshenkomen qarymta jekpe-jektiń bolý-bolmaýy jaıynda pikir bildirdi, - dep habarlaıdy Qamshy.kz QazAqparatqa silteme jasap.

«Men kez kelgen boksshymen, kez kelgen eldiń ókilimen sharshy alańda kezdesemin. Tek Evgenıı Tıshenkomen ǵana judyryqtasamyn degen oıymda joq. Ol reseılik bolsa, reseılikpen, amerıkalyq bolsa rıngte oǵan da qarsy shyǵamyn. Eń bastysy, qarsylasyńnyń qyzyqty bolǵany», - dedi ol jýrnalıserge bergen suhbatynda.

Sonymen qatar Vasılıı áýesqoı boksty tastap, birjola kásibı boksqa aýysý ázirshe oıynda joq ekendigin atap ótti.

«Eń aldymen ózimniń basshylyǵymmen, otbasymmen aqyldasyp alýym qajet. Odan keıin baryp kásibı boksqa aýysý-aýyspaýdy oılastyratyn bolamyn», - dedi ol.

Esterińizge sala keteıik, Olımpıada oıyndarynyń aqtyq synynda reseılik Evgenıı Tıshenkomen sharshy alańda kezdesken Vasılıı Levıt tóreshilerdiń sheshimimen utylǵan edi. Al mundaı sheshimge sol kezde jarysty tamashalap zalda otyrǵan kórermender barynsha narazylyq tanytqan bolatyn. Osydan  keıin elimizdiń Boks federasıasy Vasılııge Olımpıada altynyn alǵan sportshyǵa beriletin syıaqy tóleý týraly sheshim qabyldaǵan bolatyn.

«Vasılıı Levıt Olımpıada rınginiń fınaldyq kezdesýinde tamasha nátıje, jeńiske de aıryqsha erik-jiger kórsetti. Ol Olımpıadanyń kúmis medalin jeńip alǵannan keıin oǵan memleket 150 myń dollar syıaqy beredi. Buǵan qosa, Qazaqstan Boks federasıasynyń prezıdenti T.Qulybaevtyń sheshimimen atalǵan somaǵa taǵy da 100 myń dollar qosylady. Osylaısha Levıttiń syıaqysy «altynmen» teńesedi», - dep habarlaǵan edi federasıadan.

Aıta keteıik, búgin Vasılıı Levıt merzimimen buryn leıtenant áskerı shenin aldy.